Nongpoh, Lber 25: Kum uwei na u samla ka dong Ri Bhoi uba don ka mynsiem bad ka jingkitkhlieh na ka bynta ban kyntiew ïa ka roi ka par bad ka bha ka miat ki paidbah ha Ri Bhoi, u Samla Albert Maring na ka Shnong Umdap Dumu u la mih shakhmat ban kren bad ban pynsngew sha ka sorkar jylla halor ki mat jingdonkam jong ki paidbah ha Ri Bhoi ba kum ka sorkar ka la dei ban phai khmat ruh ïa ki jingdonkam jong ki paidbah ha Ri Bhoi.
Kitei ki mat ne ki jingdonkam ba une u samla u la kren ka dei ka jingdonkam ban wan rah noh ar tylli ki Civil Sub Division bad ar tylli ki C&RD Block ha Ri Bhoi kaba ki paidbah ka Ri Bhoi ki la donkam na ka bynta ban dang kyntiew ïa ki kam pynroi bad kiwei kiwei ki jingmyntoi ba ki paidbah kin sa ioh ka jingkyrkhu lada wan kitei ki tnad treikam ka sorkar jylla.
Na ka liang u samla Albert Maring u la pynpaw ba ka Ri Bhoi ka la donkam ban kyntiew kyrdan noh ïa ka Patharkhmah Adminis trative Unit sha ka Pathar-khmah Civil Sub Division ha Western Ri Bhoi bad kawei ka pat ka C&RD Block Bhoirymbong sha ka Civil Sub Divisioin na ka bynta ki paidbah ka thain Eastern Ri Bhoi.
U la kren ruh halor kitei ki Civil Sub division la donkam ruh ban wan rah noh ïa ka ophis C&RD Block kawei ha Umden bad kawei pat ha Mawhati ba da ka jingdon kitei ki ophis treikam kan pynsuk ïa ki paidbah lada don kitei ki ophis treikam kiba peit kyrpang na ka bytna ban pyntreikam ïa ki kam pynroi bapher bapher ba la wna rah da ka sorkar jylla bad ruh ka sorkar kmie.
U la pynpaw ruh khamtam ka Civil Sub Division ha Patharkhmah ka la ktah shisha ïa ki paidbah ban wan shaduh sha Nongpoh khamtam ki shnong kiba don ha khappud ka Assam Kamrup district la eh shisha ban kin wan shaduh sha Nongpoh na ka bynta ki kam ha ki ophis sorkar bad kumjuh ruh kum ka thain Eastern Ri Bhoi ki shnoing khappud ki la jngai shisha ban wan shaduh sha Nongpoh ha kaba bun ki shnong ba don ha syndah bad ka Assam ha ka thain West Karbi Anglong ki la shem jingeh ban wan shaduh sha Nongpoh.
“Ban wan ka roi ka par bad ban dang kyntiew ïa ki kam pynroi jong ki shnong bapher bapher ha Ri Bhoi la donkam ba ka sorkar kan pynurlong ïa kitei ki jingdonkam jong ki paidbah ha Ri Bhoi” ong u Samla Albert Maring, bad bynrap ruh katba ki paidbah ki dang jan bad ki ophis treikam ka sorkar katta dang lah ba pynjanai na ka bynta ban wan rah ïa ki kam pynroi bad ka bha ka miat ki paidbah,” u la bynrap.
