Beh thong bad byrngem byrsit ki nongap ïa ki kali kit mar rep

Nongstoiñ, Lber 25: Namar ka jingjyllei ki khyrdop lum khajna ha shilynter ka surok bah National Highway 44 (E) Shillong Tura bad ha ki jaka ka surok PWD ha baroh kawei ka District, ki nongïalam ka Meghalaya Commercial Truck Owner & Driver Association, mynta ka sngi ki la leit ban ïakynduh ïa u bah P.D. Sangma Deputy Commissioner ka West Khasi Hills, ban pan jingshai na u ha kaba ïadei bad kitei ki khyrdop lum khajna kiba la ong kum ki tit.
U bah Mosklandar Marngar President ka Association haba ïakren bad u nongthoh khubor, u la ong ba ka jingpan jingshai jong ki ka dei hadien ba ki don ki dkhot jong ka Association kiba na kiwei pat ki District, kiba ñiah ïa ki kali kit mar lyngba ka surok Shillong Tura, ki bym tip ha kino ki jaka ba ki don ki khyrdop lum khajna jong ki hima bad jong ka Khasi Hills Autonomous District Council. Hynrei haba ki ïaid beit, ki nongap khyrdop ki beh thong bad haba ki lap ki byrngem byrsit bad ki pan pisa da ki hajar tyngka.
Nalor kata u la ong ba ki don pat ki nongap khyrdop kiba la shim wai da ki briew kiba kham heh spah nalor ba ki byrngem ki pynibor ruh da kaba sei da ki pistol bad ki tiar pynmynsaw ba bun jait. Dei halor katei ka nongrim ba ki nongïalam ka Association, ki la hap ban leit pan jingshai na utei u khlieh ka District bad ki la ai ruh da ka jingthoh ban kyrpad ïa u ba un shimkhia halor katei ka kam.
U la ong ba ki la don shibun ki nongñiah kali kiba kit ïa ki mar rep kum u synsar, u sying bad ki jhur ki jhep ba bun jait ban shalan sha kiwei pat ki jaka, hynrei ki nongap khyrdop ki khrong khajna beit khlem map.
U la bynrap ruh ba ha ka jingshisha ka sorkar ka la ithuh ïa u synsar, u sying bad kiwei kiwei kum ki mar rep ba kongsan bad ka la bthah ruh ba ki kali kiba kit mar rep kim dei ban siew khajna ha kino kino ki khyrdop. Hynrei kaba lyngngoh ka long ba ki nongap khyrdop kim patiaw satia ïa ka jingbthah jong ka sorkar.
U bah Marngar u la ïathuh ruh ba ha kaba ïadei bad katei ka mat u Deputy Commissioner u la ong ba ban pynïeng ïa ki khyrdop lum khajna ha ki surok kiba la pyntrei da ka sorkar la ki dei ki surok PWD ne National Highway ka long kaba beaiñ. Na ka liang u DC u la kular skhem ruh ba un sa phah weng lut noh ïa baroh ki khyrdop ba shu pynieng beaiñ.
Nalor kata u la ong ruh ba lada ki hima bad ka Khasi Hills Autonomous District Council ki don ïa ki surok ba ki shna hi bad lada don ki kali kiba ïaid lyngba ki lah ban khrong khajna katba ki mon. Hynrei lada ki dei ki surok ba la shna da ka sorkar kin ym lah da lei lei ban lum khajna na ki kali lada ki kit ïa ki mar kiba kumno kumno ruh.
U bah Marngar u la ong ruh ba na ka liang u DC u la ong ba un sa pyntip sha ka sorkar da ka jingthoh bad nangne shakhmat baroh ki kali kiba kit jingkit bad kiba ïaid lyngba ka surok National Highway bad ki surok PWD, kim dei shuh ban siew khajna ha ki khyrdop bad lada ki don kiba dang lum khajna ki nongñiah kali ki dei ban pyntip sha u DC khnang ba un leh ïa kaba donkam.
Khatduh eh u bah Marngar u la kyntu ïa baroh ki nongap khyrdop ba ki dei ban sangeh noh mar dor ban lum khajna bad lada ka Association ka lap ba ki dang bteng ban lum khajna na ki kali, ka synjuk kan hap ban leh da kaba tyngeh kampher wat la kan poi ha uno uno u pud ruh.