Ba khang tala ka KSU-EJHD ïa ka Toll Plaza ha Lumshnong, pyn jari u DC da ki kyndon 144CrPC

Khliehriat nailar 5: U Deputy Commissioner ka East Jaiñtia Hills District, u Abhilash Banarwal, IAS, mynta ka jan miet jong ka 5 tarik u nailar, u la pynmih ïa ka hukum ba la pynjari da ki kyndon aiñ 144CrPC bad kane ka hukum ka la mih hadien ba ka jingakren hapdeng u ADC, u bah Jonathan Shylla bad ki dkhot ka KSU East Jaiñtia Hills District kam poi shano shano ruh bad kam long kaba sei soh ha kaba ïadei bad ka jingkhang tala ka seng ïa ka Toll Plaza jong ka NHAI kaba don ha Lumshnong.
Katkum ka hukum jong ka jingpynjari ïa ki kyndon ka 144CrPC, la mana ban ïalum bun briew, kata palat ïa ka san ngut ha kano kano ka jaka kaba don hajan ka Toll Plaza, la mana ban leh ïa kano kano ka kam bym sngewtynnad ha katei ka jaka, la mana ban rah ïa kino kino ki tiar kiba dei kum ki tiar pynmynsaw (weapon), la ong ba kane ka hukum kan treikam noh mardor tat haduh da pynbna da kumwei pat.
Ha ka hukum ba la pynmih, la pynpaw ruh ba ka Khasi Students Union East Jaiñtia Hills District, da ka bor ka la leit ban khang tala ïa ka jaka khrong khajna jong ka NHAI, ka Toll Plaza kaba don ha Lumshnong, ha kaba ki la ujor ruh ïa ka jingsniew palat ka surok NH-6 kaba don hapoh ka district,
La ong ruh, ba ha ka jingshisha, u Project Director jong ka National Highway Authority of India, u la dep aiti ne submit ïa ka jingmynjur ban maramot noh ïa katei ka surok national highway ha ka por kumba la buh, hapdeng kaba kum kane ka por ka la mih ka jingiakhih kaba la ïeng pyrshah ïa ka jinglum khajna ka NHAI na ka Toll Plaza, kumta khnang ba kei kiei kin iaid beit bad kumjuh ruh ban ïada ban lait na kino kino ki jingjia, u Deputy Commissioner, u Abhilash banarwal, kumba la pynkup bor, u la pynbna ba la pynjari ïa ki kyndon aiñ jong ka 144CrPC bad la pynbna ruh ïa kitei ki jingmana.