Shillong, Nailar 02: U President jong ka Khasi Authors’ Society (KAS) u Dr. DRL Nonglait, u la ong ba ka jingrah ban ïakren ban pynrung ïa ka Ktien Khasi ha Parliament ka long kaba biang, hynrei kaba donkam eh ka long ban wanran da ka Bill khamtam ka Official Bill ne ka Bill na ka liang ka Sorkar khnang ba kane ka Bill kan long ka aiñ bad haba ka la long ka aiñ ka mut ka Ktien Khasi ka la rung ha ka Khyrnit kaba phra jong ka Riti Synshar ka ri India.
Haba pynpaw ka jingsngewkmen ba u MP ka Trinamool Congress, u Sudip Bandhopadhay, u la rah ha Lok Sabha ban dawa pynrung ïa ka Ktien Khasi bad Garo ha ka Riti Synshar jong ka ri India, u Dr. Nonglait, u la ong ba kane ka jingkyrshan ki Party bapher bapher, kynthup ïa ka Resolution ba la mynjur da ka Ïingdorbar Thawaiñ bad ka jingkren ki MP na ka jylla ha Parliament, ka pynpaw ba ka ri India ka la tip ïa ka jingdonkam ban ithuh noh ïa ka Ktien Khasi ha ka riti synshar ka ri India.
“Kum ka Seng, ngi sngewkmen ba ka jingïakhih jong ka Seng bad ka jylla ban ithuh ïa ka Ktien Khasi ka la nang ïoh bor”, la ong u Dr. Nonglait.
Haba batai balei ba donkam ban wanrah da ka Bill ne kata ka Constitutional Amendment Bill, u President ka KAS, u la ong ba namar ban ithuh ïa kano kano ka ktien donkam ban pynbha ne pynkylla ïa ka riti synshar jong ka ri India namar ba ka hap rung ha ka riti synshar lyngba ka khyrnit kaba phra, kumba ka la long ïa ka ktien Manipuri 1992 bad ka Ktien Bodo ha ka snem 2003.
U la ong ba lada rah da ka Private Member’s Bill ruh ka biang hi, hynrei kaba bha eh kadei ka Bill na ka liang ka sorkar, ha kaba ka la don lypa ha ka jingbun briew ban mynjur ïa kane ka Bill bad kan long pat ka aiñ.
U la ïathuh ba na ka liang ka KAS ruh kan sa leit shen ha Delhi ban buddien ïa kane ka kam.
