Ka AITC ka dei ka Proxy ki heh na Kolkata balei ki tieng ban rah ïa ka ILP ha Delhi : Dy CM

Shillong, Nailar 02 : Lada ka All India Trinamool Congress (AITC) ka kynnoh ba ka sorkar MDA hapoh ka jingïalam ka NPP ka dei ka Proxy BJP, ka AITC ha Meghalaya ruh ka dei ka Proxy jong ki heh jongka na ka headquarter na Kolkata namar ïa ka mat ba kongsan tam ba ka ri bad ka jaidbynriew ka ap khmih lynti la slem bah ïa kaba la wanrah ruh da ka Resolution hapoh ka ïing dorbar Assembly ka jylla ka Inner Line Permit (ILP) ki khlem nud ban rah ha Delhi. Don aiu sha lyndet bishar hi paidbah kine ki nongïalam ka AITC ki long thik kum ki suri kup snieh langbrot, khyrwit u Symbud Myntri Rangbah bah Prestone Tynsong.
U la ong “ Balei ba nga ong kumtei, namar ïa ka kam ïa pynbeit pud bad ïa ka jingpynrung ïa ka ktien Khasi bad Garo ha ka khyrnit kaba phra ki rah ha Delhi hynrei ïa kane ka mat ba kongsan ki leh klet, lane hato ki tieng ïoh shah khyrwit ha ki heh na Kolkata lym kumta ki la dei ban rah lang ïa kane ka mat ruh. Bishar bniah paidbah ïoh shah ktha ha ki suri nalor te ki kup da kawei ka dur kum kita kiba sngew khia ïa ki mat hapoh pat da kawei ka dur, balei ki leh klet ïa ka ILP keiñ?”.
Lada phi shim khia ïa ki ar tylli ki mat phi la dei ban shim khia ïa kane kawei ruh ka mat kaba ki paid ka jylla ki thrang ban treikam ha ka jylla kaba long kum ka stieh ban ïada ïa ka ri bad ki jaidbynriew riewlum.
Ka paw shai kdar ba ka AITC kam kwah ban pyntreikam ïa ka ILP bad kim kwah ba ka jingpynbeit ïa u pud u sam ruh kan ïaid beit namar ki la dep kular ba lada ki wan ha ka bor kin pyndam ïa ka soskular (MoU) ba la dep ïasoi hapdeng ka Meghalaya bad Assam, ong u bah Prestone.
“ Nga kwah ban ong ba kine ki briew jongka AITC ne katba ki dang don ha ka Congress ruh kim kwah ban pyntreikam ïa ka ILP bad kim kwah ban pynbeit ïa u pud u sam ruh namar haba ki don ha ka bor ki khlem leh ei ei bad mynta ba ka kam ka la ïaid shakhmat ki sdang sa ka ban wan pynthut. Hato ki dang kwah ban sahteng kane ka kam sa katno phew snem nalor ba la sah mynta la 50 snem. Kumta nga kyntu ïa baroh ki nongshong shnong ka jylla ba kin bishar bniah ïa ka jinglong Pharisi arsap jong kine ki briew jongka AITC ha kane ka jylla Meghalaya” pynkut u Symbud Myntri Rangbah.