Nongpoh, Nailar 02: Namar ka jingsniew palat jong u surok naduh Umpowin Nongrim shaduh Iew Mawlasnai kaba la buh jingeh kaba khraw ïaki paidbah haka leit ka wan mynta la bun snem, ka Hynniewtrep Youth Council, Raid Nongtung Circle kan pynlong da ka jingïakhih ban mih paidbah bad ka jingteh lama iong haki bynta bapher bapher jong ki shnong ka Raid Nongtung.
Ïa katei ka sienjam ban mih paidbah bad pynlong ka jingïakhih ka dei halor ka jingkuman jong ka sorkar naduh ki nongmihkhmat ban pynioh da u surok ba bha mynta la bun phew snem ba ki paidbah ki hap ban ïaid lyngba ka khohruh khohram.
Haba phah ïaka kyrwoh naka liang u Samla Mitalin Mynsong, Publicity Secretary HYC Raid Nongtung Circle u la ong ba kum ka seng ka dap da ka jingsngewkhia kaba jur bad haduh mynta kam don kano kano ka jingshimkhia jong ka sorkar naduh ki nongmihkhmat ban peit ïaka eh ka shon jong ki paidbah haka leit ka wan kaba ki hap ban mad ïaka jingeh kaba khraw naka jingsniew jong u surok bad ka khohruh khohram, khamtam haka pang ka shitom.
Kumta naka liang ka seng ka wer paidbah ha katei ka sngi naduh ki nongïalam shnong, ki longkmie longkpa bad ki khun samla ban mih paidbah kum ka dak ka jingpyrshah halor ka jingleh mynthi ka sorkar ïaki paidbah ba shong ba sah ha katei ka thaiñ, u la bynrap.
