Lano ka sorkar kan pyntreikam ïa kita ki bus skul ha kane ka nongbah Shillongka long ka jingkylli kaba la wan na man la uwei pa kawei namar ki kwah ban ïohi ïa ka jingduna ka dheng kali. Kumba long mynta ka jingdheng kali kaba jur ka long haka por step bad por janmiet naduh ki kynta por ba wai skul haduh ba wai ki ophis sorkar . Hooid ka sorkar ka la pynkhreh ban thied noh 100 tylli ki mini bus ban pynïaid ha nongbah Shillong tang ban kit ïa ki khynnah skul ban pynduna ïaka jingdheng kali bad kane ka long kaei kaei kaba dei ban ïaroh hynrei ïa kane kajuh ka polisi dei ban pyntreikam wat ïa ki nongtrei sorkar ruh namar ki ruh ki dei kawei na ki daw bah jongka jingdheng kali ha kane ka nongbah.
Ym lah ban len ka jingdheng kali ha kane ka nongbah ka sdang ha ka por mynstep ba leit on skul ïa ki khynnah skul bad bteng haduh ka por 10 bad 11 baje ba leit trei ki nongtrei sorkar. Ha ka por wai skul ka la sdang biang ka jingdheng kali bad ka bteng haduh ka por janmiet ba wai trei ki ophis sorkar ha kaba teng teng ki briew kiba ïaid lynti lyngba kane ka nongbah Shillong ne kiba mih na kane ka nongbah Shillong ban leit sha kiwei ki jaka ki hap ban sahkut da ki kynta kynta ban lait na kane ka nongbah Shillong.
Kumta ym dei tang ki khynnah skul hynrei wat ki nongtrei sorkar ruh ki dei ka bynta jong kane ka jingdheng kali. Ym dei ba kren beiñ ne peit poh hynrei kumno keiñ yn ym dheng kali da ki kynta namar wat ki peon ruh ki la rah da ki kali ban leit trei. Mynshwa ha ka por wai trei dang ïohi ba ki nongtrei sorkar ki ïamih bad haba ki ïaid naduh ki thaiñ secretariat shaduh Police Bazar la i kumba ïa ïaid paidbah, hynrei lada peit mynta ha ki por wai ophis la duna kiba ïaid kjat namar la rah kali lut naduh ki peon ter ter haduh ki LD, UD khlem da kheiñ ïa ki ophisar kiba la dei ban ïoh kali na ka sorkar.
Kawei na ki daw ba la ïoh ban thied kali lut da ki nongtrei sorkar ka dei ba ki bank ki la shu ai ram laitluid beit ïa ki namar ki ioh tulop sorkar. Katba kiba shah ktah pat ki dei ki paidbah. Balei ba jur ka dheng kali namar tang ki jaka pynïeng kali ruh ym ngiam shuh hapoh ki phyllaw ophis hap ban pynïeng sa sha rud surok bad kane ka la wanrah ka jingkhapngiah ïaka surok nalor ba ka surok ka dei kaba rit lypa.
Kumta lada ka sorkar ka lah shisha ban pyntreikam ïakane ka jingthmu ban thied da ki mini bus ban kit ïa ki khynnah skul ka la dei ruh ban leh lang ïa ki nongtrei sorkar. Nalor kata balei keiñ ba ka sorkar kan dang kwah ban pynlut phut ïa ka pisa u paidbah haba ki bus saw da ki hajar tylli ki la don ha kane ka nongbah bad bun kiba la shu ïeng khlem da kheiñ ïa kiba la shu bret shane shatai khlem da ai jingkhein sha ki paidbah. Balei ka sorkar kam pyndonkam da kine ki bus saw ban kit ïa ki khynnah skul bad ki nongtrei sorkar balei ban dang hap ban pynlut ksan shuh shuh.
Hato kane ka dei tang ka buit ban ïoh ïabam pisa ne ïa pynmih pisa na ka bynta ka election MLA 2023. Lada dei ka sorkar kaba kunai pyndonkam da kine ki bus saw kiba don ha kane ka nongbah ban kit ïaki khynnah skul bad ïa ki nogtrei sorkar ruh ka la biang palat eh.
Kumno keiñ kane ka sorkar MDA kam don jinglehraiñ khyndiat ruh ïaki paidbah namar katne la lap tyngkreiñ tyngkreiñ ïa ka jingbamsap na kaba tih bad khaïi dewiong beaiñ ïa kaba la pynksan bad lap wat da ka ïing Bishar High Court ruh, hynrei mynta sa kine ki kam pynlut phut ban thied bus ban thied ïa kita ki electrict bus, hato kine kin treikam haduh katno kaba ma ka long ïoh long kum ka skhim pynïaid kali da ki light saw light jyrngam ba la shu jah rngai mynta ha kane ka nongbah Shillong bad kita ki mini bus ruh ïoh ki kylla long kum kine ki bus saw ba kat shaba leit la shu lap ba la shu pynïeng beit ïa ki shi jaka khlem da shna pynbha shuh ïa ki bad la shu ïeh ba kin pyut kumto.
