Haduh 42 tylli ki kam ha Transport lah ban leh online naduh rejistar kali, permit bad laisen kali

Ym donkam shuh ban leit shaduh DTO

0

Shillong, Naiwieng 21 : U Myntri Rangbah ka Jylla dang shen u la plie paidbah ïa ka Digital Transport Citizen Services bad e-Challan System, ryngkat bad ka Online Application Portal na ka bynta ka jingïoh jingïarap pisa (Subsidy) jong ki kali Electric Vehicle (EV) hapoh ka Meghalaya Electric Vehicle Policy – 2026.
Lyngba kane ka rukom treikam digital kaba thymmai, ki paidbah kin lah ban pyndonkam ïa 42 tylli ki jingshakri jong ka tnat Transport lyngba ka online, kiba kynthup ïa 26 tylli ki jingshakri jong ka VAHAN, 12 tylli jong ka SARATHI bad 4 tylli ki jingshakri jong ka e-Challan.
Ki jingshakri kiba ïadei bad ka jingrejistar kali, ki permit, ka jingsiew khajna kali bad ka jingpynïoh driving licence, yn lah mynta ban pyndep lyngba ka online khlem da donkam ban leit bunsien sha ki ophis DTO.
Na ka bynta ban pynkhlaiñ ïa ka jingpyntreikam ïa ki kyndon ñiah kali, ka tnat Transport ka la pynbiang 50 tylli ki kor Point-of-Sale (POS) ïa ki DTO bad MVI ban shimkam ïa kiba pynkheiñ aiñ ha surok ha kato hi ka jaka.
Ka e-Challan System kan pynlah ïa ki ophisar ban ai challan lyngba ka electronic system bad ki paidbah kin lah ban siew online, kaba pynduna ïa ka jingpyndonkam ïa ka pisa tyngka bad ki kam thoh kot da ka kti. Ki jingtip kiba la buh ha ka rukom digital kin pynbha ïa ka jingbeit, ka jingtreikam kaba shai bad ka jingpeit bniah ïa ka jingpyntreikam ïa ki kyndon ñiah kali ha kylleng ka Jylla.
Ki paidbah kin lah ruh ban phah ïa ki jingpynsngew pyrshah ïa ki challan bad buddien ïa ki jingujor jong ki lyngba ka online, khnang ban pynthikna ïa ka jingkitkhlieh bad ka jingsahteng ïa ki jingeh ha ka por kaba biang.
Ha kajuh ka por, la pyllait paidbah ruh ïa ka Online EV Subsidy Application Portal kaba la pynkhreh ryngkat bad ka NIC Meghalaya, ban pynthikna ba ki jingmyntoi jong ka EV Subsidy Policy kin poi sha ki nongïoh jingmyntoi da ka rukom kaba shai.
Ki nongpan jingïarap kiba biang katkum ki kyndon kin lah ban rejistar, upload ïa ki kot ki sla, pan ïa ka subsidy, buddien ïa ki application jong ki bad ïoh ïa ki jingpynbna lyngba kane ka portal. Kane kan pynduna ïa ka jingdonkam ban leit bunsien sha ki ophis Sorkar bad ïa ki kot ki sla.
Shuh shuh, ha kane ka sngi la ïasoi ruh ïa ka Memorandum of Understanding (MoU) bad ka SaveLIFE Foundation ban pynkhlaiñ ïa ka jingshngaiñ ha ki surok ha Meghalaya lyngba ka jingïatreilang halor ka jingpynkhreh ïa ki polisi bad ki sienjam katkum ki jingtip ba la lum.

Leave A Reply

Your email address will not be published.