Byrngem ka KHBBA ban pynpaw pyrthei ïa ki kam bamsap jong ka SMB
Ka sorkar kadei ban thaw da kiwei pat ki lad
Shillong, Naiwieng 21: Ka Khasi Hills Bazar Bus Association (KHBBA) ha ka sngi saitjaiñ ka la pynpaw biang ïa ka jingpyrshah ïa ka jingthmu jong ka Sorkar ban pynkynriah ïa ki bos na Mawlong Hat Parking Lot sha ka Parking Lot kaba don pyrshah ïa ka Anjali Cinema Hall, Shillong, da kaba byrngem ban pynpaw pyrthei ïa ki kam bamsap ba la leh da ki nongtrei jong ka board.
U bah Kyrshan Rynjah general secretary u la ong ba ka seng ka la dawa na u heh ophisar ka Shillong Municipal Board (SMB), u PK Boro ba um dei ban pynkynriah noh ïa katei ka jaka ïeng kali na ka jaka ba ka don mynta, hynrei la shu kren bym dei manla ka por.
Haba pynpaw ïa ka jingbitar ïa u CEO, ka seng ka la ong ba une u briew u ai ïa ki jingthoh kiba ïa pyrshah man ka por.
Ka seng ka la ong ba lada ka Shillong Municipal Board ka rai ban nym pynbor ïa ki ban mih na ka jaka ïeng kali jong ki kaba ki don mynta, kan hap ban sei madan ïa ki kam bymman jong ka SMB.
U bah Rynjah u la ong ba ka sorkar ka la ai por ïa ka seng haduh ka 12 sngi bad ka jingpuh por ka sorkar sorkar haduh kaba 25 tarik mynta u bnai, ban pynlait ïa ka jaka ïeng kali hynrei kim shym la leh bad ki la ïakynduh wat ïa ki bor pynïaid ban pyntip ïa ki halor ka jingïeng jong ki.
U la pyntip ba ki la aiti wat ïa ka jingpynpaw pyrthei balei ba kin ym mih na katei ka jaka hynrei haduh kine ki sngi ka sorkar kam pat khot ïa ki ban ïakren halor katei ka kam.
Halor kane la ong, “Ka shithi ba ngi la ïoh na ka SMB ka shu kdew ba ngi la hap ban pynkynriah noh ïa ka jaka ba ngi don mynta khlem da bishar bniah la ka jaka ba la pynkynriah ïa ngi ka long kaba lah ne em.”
Katkum ka jingong jong u, ka Parking Lot kaba don marpyrshah bad ka Anjali Cinema Hall, kan long kaba lah ban pyntreikam tang na ka bynta ki kali kiba kham rit hynrei ha ka jaka ba mynta la pynïeng ïa ki bus bad kiwei kiwei ki kali heh.
Katkum ka jingong u bah Rynjah ka jingpynkynriah ïa ka jaka ïeng kali na ka jaka ba ka don mynta ka long tang ban pynsngewbha ïa ki nongdie madan bad kam don jingïadei eiei ban pynsuk ïa ka jingkhapngiah kumba la kam da ka sorkar.
Hadien ki jingïakhih ha kylleng ka tarik tynrai jong ka 12 tarik u Naiwieng, ki khubor ki pyni ïa ka por ba la buh ha ka 25 tarik u Naiwieng ban pynlait ïa ka jaka ïeng kali ha ïew Mawlonghat.
U Bah Rynjah u la pynpaw ba lada ka sorkar ka khot ïa ka seng ban ïakren, lada dei ban leh kumta ym ban pynsngewthuh ïa ki ban pynlait noh ïa ka Parking Lot hynrei ban ailad ïa ki ban buh ïa ki mat jong ki shakhmat balei kim kwah ban mih noh na ka jaka ba ki don mynta kaba long kaba kngsan bha na kane ka jaka.