Pynlong jingïasyllok ka FSSAI ban shngaiñ ka bam bad pynneh ìa ka bam tynrai ha ka jylla

0

Shillong, Naiwieng 21: Ka Food Safety and Standards Authority of India (FSSAI), kaba hap hapoh ka tnad ka koit ka khiah bad ka bha ka miat jong ki longïing longsem, ha ka jingïatreilang bad ka Commissionerate of Food Safety, sorkar Meghalaya, kala pynlong ïa ka jingïalang ba nyngkong jong ka ‘Eat Sustainable Summit’ ha Shillong ha ka 18 bad 19 tarik u Naiwieng, 2026.
Kane ka jingïalang ka dei kaba la ai kyrteng ka ‘Plate and Planet – Evoking Traditional Wisdom for a Sustainable Future’, ha kaba la pynlong ar sngi ia kane kala wanrah lang iaki nongthaw polisi, ki nongtrei jong ka jingshngaiñ ka bam, ki skul bah, ki nongseng kam lajong bad kiwei kiwei ki nongïoh jingmyntoi ban pynshai halor ki rukom rep bad pyndonkam bam ba neh slem bad ka bynta jong ki rukom bam tynrai ban kyntiew iaka jingbam ba kitkhlieh ha ka imlang sahlang.
Ha katei ka jingïalang, u Myntri ka koit ka khiah, sorkar Meghalaya, u Bah Wailadmiki Shylla, u la batai ba kumno ki rukom im tynrai jong ka jylla Meghalaya ki pynpaw ïa ka jingshemphang ba la slem bha shaphang ka jingpynneh pynsah bad ka jingim lang ryngkat bad ka mariang.
Da kaba kdew sha ki jingkieng jri jong ka jylla, u la ong ba kine ki jingtei ba phylla, ba la shna da kaba pynwandur ïa ki thied jong ki dieng ba im halor ki wahduid bad ki them, ki pyni kumno ki longshuwa kila treilang bad ka mariang. U la ban jur ïa ka jingdonkam jong kane ka jingstad tynrai ha kaba thaw ïa ki rukom pyndonkam ba neh slem na ka bynta ka lawei.
ïa kane ka prokram la sdang da ka jingïaid-kjat kaba la plie paidbah lang da u Dr. Joram Beda, Commissioner bad Secretary jong ka Sorkar Meghalaya, tnad ka koit ka khiah bad u Commissioner of Food Safety, Meghalaya bad u A. Singh, Regional Director, FSSAI Regional Office, Kolkata.
La pynlong ïa kane ka prokram ha State Convention Centre, Shillong, ha kaba ka jingmih bad ka jingpdiang ïa ka ‘Eat Sustainable – Thematic Pillar Document’ ka dei kawei na ki mat ba kongsan tam. Kane ka kot ka kdew ïa ka rukom treikam kaba pura kaba don hynñiew tylli ki rishot ban ïalam ïa ka jingpyntreikam bad ka jingpynïar shuh shuh ïa kane ka sienjam ha ki por ban wan.
Ha katei ka jingïalang, la don da u Abhimanyu Singh, ba dei u Regional Director, FSSAI Eastern Region, ryngkat ki heh nongtrei ka FSSAI bad ka State Food Safety Department.
Lyngba ka jingpyrshang kaba kyrteng ka ‘Eat Sustainable’, ka FSSAI ka thmu ban jam shakhmat na ka jingpynsngewthuh sha ka jingkylla kaba neh slem ha ka rukom im, da kaba pynshlur ïa ki nongshong shnong, ki jaka pule bad ki karkhana ne ki nongkhaïi bam ban jied ïa ki jingbam ha ka rukom kaba shai bad kaba kitkhlieh.

Leave A Reply

Your email address will not be published.