Leh marwei u Bernard halor ka RTI, Khlem jingbit bad jingtip ka BJP state unit: BJP

0

Shillong, Naiwieng 21: Ka Bharatiya Janata Party, Meghalaya Pradesh, lyngba u State General Secretary u la pynshai ha kaba ïa dei bad ka RTI, kaba la ujor da u Bernard N Marak, uba pan jingtip halor ka jingbei tyngka ïa ka Gospel Fest.
Ka State Unit ka kwah ban pynpaw shai kdar ba ïa katei ka jingpan RTI ba la kdew la leh shimet da u Bernard N Marak bad kam dei kaba la ai bor da ka BJP Meghalaya Pradesh.Ym shym la kylli jingmut na ki nongialam ka Jylla, bad kim shym la tip ruh ba kum kane ka aplikeshon RTI la dep ban ai.
Kumta ka long kaba sngewsih ba ïa ka jingleh jong u riew shimet la pyni kum ka nongrim ne ka jingleh ba thikna jong ka Bharatiya Janata Party, Meghalaya Pradesh.Ban shu kynnoh ïa ka party baroh kawei ha kane ka kam bad ban ai ïa ka jingkitkhlieh lang na ka bynta ka jingleh ba la leh hi da u riew shimet ka long kaba khlem nongrim bad kaba ialam bakla.
Ka BJP Meghalaya Pradesh ka ngeit ha ka jingkren paidbah kaba don ka jingkitkhlieh, kaba tei bad kaba shai.Ka party ka burom ïa ka jingsngew bad jingngeit jong baroh ki jaitniam bad ka ïai bteng ban pynneh ïa ka jingburom markylliang, ka jingiasngewthuh jingmut bad ka jingiashong suk shong sain hapdeng ki paidbah ka jylla Meghalaya.
Ka party ka kwah ban pynpaw ba kane ka jingpan RTI kam don kano kano ka jingbthah ne jingkyrshan na ka State Unit.Kano kano ka jingpyrshang ban pyniadei ïa ka party baroh kawei bad kane ka jingleh shimet ka long kaba bakla.
Ka BJP Meghalaya Pradesh ka dang ïai bteng ban shakri ïa ki paidbah ka Meghalaya bad ban pynneh ïa ki jinglong jong ka jingburom mar kylliang, ka jingiakynduh lang bad ka jingkitkhlieh ïa ki paidbah.

Leave A Reply

Your email address will not be published.