Ha ki phra snem ka sorkar kala kynduh jingeh shibun ban kyntiew ïa ki kam jngohkai pyrthei, ong u Conrad
Shillong, Naiwieng 21: U Myntri Rangbah ka jylla u Conrad K. Sangma haba kren ha ka jingïalang kaba ar sngi kaba la tip kum ka Responsible Tourism Summit and Awards 2026 kaba la pynlong da ka tnad jngohkai pyrthei da ka jingïatreilang bad ka Outlook Traveller ha Shillong.
Ha ka jingkren u Myntri Rangbah u la ong ba ka lynti kaba kumno kila ïaid ha kine ki phra snem kiba la leit haba ïa dei bad ka kam jngohkai pyrthei ha kane ka jylla bad ka sorkar kala ithuh ïa ka kam jngohkai kum kawei ka bynta kaba kongsan kaba don ïa ka lad ban kiew.
Kane ka kam jngohkai pyrthei ka dei ka bynta kaba lah ban kyntiew ïa ka kamai kajih ïa ki briew bad ka dei ka bynta kaba lah ban plie sha ka pyrthei baroh kawei bad kan long ka lad ïa ki nongwan jngohkai na kylleng ka pyrthei ba kin ïoh ïa kaei kaba ka jylla ka don.
Da kane ka rukom pyrkhat ka sorkar kala sdang ban pyntreikam ïa ki katto katne ki bynta bad kum ka sorkar ka sngewthuh shai kdar ba nym wan rah ka jingkylla kaba mar mar bad ka sorkar ka kwah ban don la ka kyrteng na ka bynta ka jylla ha kaba ki kwah ba ka pyrthei kan tip ïa ka kyrteng kaba ka don.
Ka sorkar ka tip shai ba kan nym lah ban urlong tang ba don kawei ka jingïalang, kawei ka jingpynlong ïa ka jingrwai ne ban plie kawei ka Five Star Hotel, hynrei haba shim lang ïa ki baroh bad dei ban pynlong man ka por bad haba leh ïa kata hap ban don ka jingïatreilang jong baroh.
Haba ka sorkar ka pynïaid ïa ki sha khmat ki paidbah ruh ki dei ban ïoh ïa ka jingmyntoi kum ki Home Stay, Prime Tourist Vehicles, kum ki dukan kiba don harud surok ka sorkar ka ai jingïarap ba kin pynbha ïa ki dukan.
U Myntri Rangbah u la ong ba ka long ka jingsngew sarong ba ka BBC ka la buh ïa ka jylla Meghalaya ha ka thup jong ki 20 tylli ki jaka haka pyrthei kiba khring ïa ki nongwan jngohkai pyrthei na ka bynta u snem 2027.