Da ka skhim umbam ba 2 klur tam ioh ka shnong Nongtyrlaw ban pynpoi um ha man ki thliew iing

Nongpoh, Lber 24: Ka long ka jingkmen bad ka jingkyrkhu kaba khraw ïaka shnong Nongtyrlaw kaba don ha Ri-Bhoi District kaba dei kawei naki shnong kaba mad jingeh mynta la bun snem naka jingkyrduh um, kaba ki paidbah ki ju phohsniew ban ioh ïaka umbam umdih kaba paka katei ka jingphohsniew jong ki kala urlong mynta ka sngi hadien ba la lah ban plie paidbah syndon ïaka skhim umbam umdih bala tip kum ka Nongtyrlaw Combined Water Supply Scheme (CWSS) haka shnong Nongtyrlaw.
Ïa katei ka skhim la mang pisa haduh 2.53 klur lyngba ka Jal Jeevan Mission jong ka tnad PHE la wan ban paidbah da u Bah Mayral Born Syiem MLA ka Nongpoh kum u kongsan haka jingdonlang u Bah Balajied Ranee MDC ka Nongpoh, Bah E Lamare SE ka tnad PHE, Ri-Bhoi District, Bah DD Umdor SE PHE Shillong bad kiwei kiwei ki ophisar naka tnad PHE, ki riew rangbah, ki Rangbah Shnong naki shnong bapher bapher ryngkat ki longkmie longkpa bad ki khun samla jong katei ka shnong kiba la pynpaw ïaka jingkmen kaba khraw ba kila ioh ïaka umbam umdih kaba paka.
Haba kren ha katei ka sngi naka liang u Bah Mayral Born Syiem kum u kongsan u la pynpaw ka jingsngewkmen ban iohi ba katei ka shnong kala ioh ïaka umbam umdih kaba paka hapdeng ka jingphuh mut phuhwat hadien bun snem ka jingmad jingeh kaba khraw naka jingkyrduh um, hynrei mynta ki paidbah kin nym khuslai shuh namar ka um kala poi ha man la ki thliew iing.
Ka um ka dei kaba kongsan tam haka jingim jong ki briew nalor ka lyer bad ka bam kumta ka long kaba kongsan ba ki paidbah ki dei ban sngewthuh halor ka jingkordor jong ka bad kumno ngin leh ban pynneh pynsah ïaki tyllong umdih, kumba ngi la sakhi ba ka dei ka jingleh jong u briew hi kaba pynlong ïaki um ban tyrkhong bad rngad noh la ong u Bah Mayral Born da kaba kyntu ruh ïaki paidbah ba ki dei ban ieid ïaka mariang naka bynta ka umbam kaba paka bad ka lyer kaba khuid.
U la kyntu ruh ïaki paidbah ha katei ka sngi ba kin pynneh pynsah ïa katei ka um bad ki tyllong um khamtam ban sumar ïa katei ka skhim bala ai da ka sorkar naka bynta ka jingmyntoi jong ki paidbah ha katei ka shnong ba kim donkam shuh ban leit tong um sha ki jaka ba kham jngai kum haki por ba mynshuwa.
La ai jingkren ruh ha katei ka sngi da u Bah E Lamare SE ka PHE u la pynpaw ba ka shnong Nongtyrlaw ka dei kaba donbok tam bakala ioh kum katei ka skhim kaba kyrpang bala mang da ka sorkar naka bynta ban pynpoi um ha manla ki thliew iing bad lyngba katei ka sngi ki paidbah kin nym khuslai shuh ha kaba ïadei bad ka umbam umdih kaba paka namar la lah ban pynpoi ha man la ki thliew iing.
La pynphuh pynphieng ruh ha katei ka sngi da ki jingrwai ki jingshad bad ki skit lyngkot bala shim bynta da ki samla bad longkmie jong katei ka shnongban pyni ba kumno ka shnong kala kylla naduh bala ioh ïaka skhim umbam kaba paka.