Kyntu ka HBDRF ïa ka sorkar jylla ban ithuh noh ïa ki shnong Pnar ha Block-I

Ki nongshong shnong ki shah kyntait ïa ki hok

0

Shillong, Naiwieng 20: Ka Hynniewtrep Border Dispute Redressal Forum (HBDRF) ka la aiti ïa ka jingujor sha u Chief Secretary u Dr Shakil P Ahammed ban pan jingithuh noh mardor bad ban pynrung ïa baroh ki shnong Pnar kiba don ha Block-1 khamtam ïa ka shnong Labang Nangphyllut Dolloiship bad Pangam Raliang.
Katkum ka kdorkhas, ka Forum ka la ong ba ki shnong ha ka histori bad ka jaka ki long ka bynta kaba kongsan jong ka Hima Jaiñtia.
“U Dolloi ka Labang Nangphyllut u dei u bynta ba donkam eh jong ka Hima Jaiñtia bad u dei uwei na ki Dolloi ba pawkhmat ba la rim tam jong ka Jaiñtia, uba la tip kum ka Ka Ri Khadar Dolloi,” la ong ka khubor.
La ong ba ha ka por jong ki nongsynshar phareng, kata naduh u snem 1835 haduh u snem 1947, katei ka jaka ka dei jong ka Jowai Civil Sub-Division.
Ka Forum ka la kynnoh ba ha ka por ba thaw ïa ki District Council, ka Sorkar Assam “da kaba leh jubor bad bakla” ka la buh ïa u pud u sam sha ka United Cachar Mikirs Hills, kaba la tip mynta ka Karbi Anglong, lyngba ka Notification No.TAD/R/31/50/148 dated April 13, 1951.
“Ïa kane ka jingleh la leh khlem ka jingbishar lypa, khlem ka bor aiñ, khlem ka jingmynjur jong ki riewlum, lane khlem ka jingbud ryntih ïa ka Sixth Schedule, bad khlem ka jingtip ne jingmynjur jong ki paid Khasi Pnar, kiba dei ki nongshong shnong tynrai bad ki nongseng ïa ka khyndew ka shyiap,” ong ka dorkhas.
Ka la kynnoh ba ka Sorkar Assam hadien ka la kam ïa ka jingbymhok.Lyngba ka Shithi No.TAD/REV/99/55 jong ka 21 tarik u Naiwieng 1955, bad ka Shithi No.RSR/296/51/130, la pynshai ba ia kane ka thain dei ban pynphai biang.
Shuh shuh ka Forum ka la kdew sha ka shithi ba la thoh ha ka 5 tarik u Naiwieng, 1957, ha kaba la bthah ïa ka United Khasi & Jaiñtia Hills bad ka United Cachar & Mikirs Hills District Council ba kin bishar biang bad pynlong ïa ka jingjurip lang.Ka la ong ba ïa ka jingjurip la pynlong naduh ka 17 haduh ka 23 tarik u Rymphang, 1958, naduh Umbasso haduh ka shnong Jrikyndieng, bad ïa ka kaiphod jurip la aiti sha ki District Council.
Ka la kdew ruh ba ka Jaiñtia Hills Autonomous District Council (JHADC) ka la thaw ïa ka Elaka Labang Nangphyllut ha ka 8 tarik Naiwieng ha u snem 2023, bad thung ïa u ma Prolin Samayang kum u Acting Dolloi.
“La ai ïa ka Sanad lane ka Certificate na ka bynta u Dolloi ba shipor bad ïa ki nongsynshar shnong (Waheh Chnong) lyngba ka Notification No.JHADC/POL/14/2024/2 dated June 27, 2024,” ong ka Forum.
Wat hapdeng kane, ka la ong ba ka Sorkar Meghalaya kam pat ithuh ïa ki shnong, kaba la pynlong ïa ki nongshong shnong ban ym don ki kot ki sla kiba donkam.

Leave A Reply

Your email address will not be published.