Ïathir ka tnat rep kumno ban pynkhlaiñ ïa ki kam rep ha kane ka thaiñ shatei lammihngi

0

Shillong, Naiwieng, 20: Ka tnad jong ka rep ka riang bad ka bha ka miat jong ki nongrep, sorkar India, kala pynlong ïa ka jingïalang paidbah halor ka skhim jingpynkhreh rep kaba la pynïaid da ka tnad ka rep ka riang ha ka 17 tarik Naiwieng 2026 ha Courtyard by Marriott, Shillong.
Ha kane ka jingïalang la wan ban ïa shim bynta da ki nongmihkhmat na baroh ki jylla ka thaiñ shatei lam mihngi ban ïakren halor ka jingïaid shaphrang, ka jingpyntreikam bad ki jingkyrmen na ka bynta ka lawei jong kane ka skhim hapoh ka thaiñ.
Kane ka jingïalang ka la ai ïa ka rynsan kaba kongsan na ka bynta ban khmih bniah ïa ka jingpyntreikam ïa ka AIF Scheme ha baroh kawei ka thaiñ shatei lam mihngi da kaba ïakren pynleit jingmut ha ka jingïaid shakhmat jong ka jingmynjur ïa ki projek bad ka jingpyllait ïa ka ram, ka jingïatreilang bad kiwei pat ki prokram jong ka sorkar bad ki jingeh ba kyrpang kiba la ïakynduh da ki jylla.
Katba bun ki nongmihkhmat na ki jylla bapher bapher kila sam ïa ki jingshem jong ki, kila kdew ïa ki jingeh ha kaba pynurlong ïa kane ka skhim bad kila wad ïa ki lad ki lynti ban pyniar ïa ka jingïoh bynta bad ban pynkhlaiñ ïa ka jingtreikam jong ka.
Kane ka jingïalang kala kut da ka jingban jur biang ban pynkhlaiñ ïa ka jingïatreilang hapdeng ki tnad treikam bad ka jingiashim bynta lang ban pynsted ïa ka jingpynlut pisa ha ki jingdonkam ba kongsan na ka bynta ka rep ka riang ha baroh kawei ka thaiñ shatei lam mihngi.
La kdew shai ïa ka bor bad ka jinglah kaba khraw jong ka AIF Scheme ban pynkhlaiñ ïa ka jingpynïaid hadien ka jingot lane kheit ïa ki mar rep, ban kyntiew ïa ka jingpynjanai bad pynkiew dor ïa ki mar, ban pynjanai ïa ki lad jingïadei bad ki ïew ki hat, bad ban tei ïa ka rukom rep kaba khlaiñ bad kaba lah ban ïeng rasong na ka bynta ka jingmyntoi jong ki nongrep bad kiwei pat ki nongïashim bynta.
Ha kane ka prokram, la don u Timothy D. Shira, Myntri ka rep ka riang bad ka bha ka miat ki nongrep, sorkar Meghalaya, kum u kongsan, ha ka jingïadon lang u Anbalagan P, IAS, Joint Secretary (AIF), tnad ka rep ka riang bad ka bha ka miat ki nongrep, sorkar India, u Gavade Sachin Shankar, IFS, Additional Secretary, tnad ka rep ka riang bad ka bha ka miat ki nongrep, sorkar Meghalaya.
U Goonjan Kumar, Joint Director, tnad ka rep ka riang bad ka bha ka miat ki nongrep, sorkar India, u bah S. Rani, Director ka rep ka riang bad ka kong M. Dkhar, Director ka rep ka riang (R&T), tnad ka rep ka riang bad ka bha ka miat ki nongrep, sorkar Meghalaya. La don ka jingïashim bynta lang ki nongmihkhmat jong ka NABARD bad kiwei kiwei.

Leave A Reply

Your email address will not be published.