SSA Champions Cup 2026: Pynliem ka Lajong ïa ka Mawkhar ban rung sha ka semi final

0

Shillong, Naiwieng 20: Ka Shillong Lajong FC ka la hap ban sei lut ïa ka bor ban wanphai na ka ar kol sha ka jingjop da 3-2 pyrshah ïa ka Mawkhar SC ha ka jingïakhun jong ka Group B haka SSA Champions Cup 2026 hynne ka sngi Thohdieng ha SSA Stadium.
U Mackiven Shyrkon (16’) bad u Donbok Sohtun (25’) ki la pynkhihjar mar shi sien hapoh shiteng kynta jong ka jingïakhun ban buh hakhmat ïa ka Mawkhar shuwa ba ka Lajong kan wanphai da lai tylli ki kol lyngba u Wilbert Marbaniang (34’), u Emanbha Marbaniang (45’) bad u Badondor Marbaniang (68′) ban pynkylla ïa ka jingïalehkai.
Kumta ka Lajong (kaba la khur mynta 9 point naki lai sien ïakhun) ka la lah ban pynthikna ïa ka kyrdan jong ka ha khlieh duh jong ka Group bad ban ïohrung sha ka semifinal. Ka Mawkhar (6 poiñ na ki saw sien ïalehkai) ka dang don ha ka kyrdan ba-ar hynrei kane ka dei ka jingïalehkai ba khatduh jong ki bad baroh lai tylli kiwei pat ki kynhun kiba don ha kane ka Group-ka Sanmer SC, Sohryngkham SC bad ka Sei La Sap FCC ki ïaryngkat mar 3 poiñ bad ki dang sah sa kawei ka jingïakhun ban pyndep.
Ka Mawkhar ka la thep tang lai kol ha ki lai tylli ki jingïalehkai jong ka shuwa kane ka jingïakhun hynrei ka la pynkyndit da kaba pynkhihjar arsien pyrshah ïa ka Lajong, ka bym pat shah thep shuwa kane ka jingïakhun.
U Mackiven u la thep da ka kjat kadiang ïa ka kol kaba nyngkong kaba la ïaid lait ïa u rangapkol ka Lajong u Lakpa Lama, hadien ba u la ïohpdiang ïa ka bol pashat na ka liang kadiang.
Nangta u Donbok u la thep ïa ka kol kaba ar hadien ba ïohpdiang ïa ka bol pashat na liang kamon kaba la pynkhihwin ïa ki nongkyrshan jong ka Mawkhar, kiba la sngewkmen haduh katta katta ba ka lahduh jong ka First Division ka la lah ban lamkhmat da ar kol pyrshah ïa ka kynhun ba wan ba ar ha ka Shillong Premier League.
Tang hadien katto katne minit u nongapkol ka Mawkhar u Skhembor Mashra, u la leh ïa la ka jong ka bynta ban khanglad ïa u Wilbert bad ruh ïa ka free-kick jong u Iohborlang L Lyngkhoi.
Hynrei ka Lajong kam shym la duh jingshaniah ha lade ban wanphai sha ka jingïakhun bad ka jingtrei shitom jong ki ka la seisoh hadien ba u Wilbert u la pynphai kawei, da kaba pynïasoh tiak da ka khlieh ïa ka bol katba ka Mawkhar ka dang ap khmihlynti ïa ka rai offside ka bym shym la wan. Nangta u Emanbha u la pyrshang da kaba tyngeh ban pynïakhaid ïa ka jingïalehkai shuwa ban jam sha ka por shongthait.
Ka namtam jong ka Lajong ka la urlong na ka freekick kaba la shut da u Rimankhraw Kharumnuid. Ka bol pashat na kane ka freekick ka la ïaid lait ïa u Skhembor bad u Mebanaibok Kharbudnah ka Lajong, bad ha kane ka khyllipmat u Badondor u la phai sha kawei pat ka liang; hynrei donbok ka bol ka la leit ban tyngkhuh ïa u shuwa ban jam shabar u laiñ.
Kin don ar tylli ki jingïalehkai ha kane ka sngi Saitjaiñ ha kaba baroh ar tylli ki jingïakhun kin sdang ha ka por 2:30 baje nohphai sngi. Ha ka Group A ka Mawpdang SC kaba wan ha ka kyrdan kaba lai bad ka Lamlynti FC kaba wan ba saw kin ïakhun pyrshah ha SSA Stadium, katba ha MFA Ground jong ka Group B ka Sanmer kaba wan ba lai kan aireng pyrshah ïa ka Sei La Sap kaba wan sha trai duh.

Leave A Reply

Your email address will not be published.