U Myntri ka tnad Pule u beh ba ngin leit sha kiwei pat ki jylla ha ka jingïakynduh bad ngi: MGLPSCTA

Shillong, Nailar 01: Ki nonghikai contractual hapoh ka shatri Meghalaya Government Lower Primary School Contractual Teachers Association (MGLP SCTA) kiba la shah beh kam noh ha ka sorkar jylla ki la pynlong ïa ka jingïakhih shong ïakhih bad sah miet ba khlem buh sngi ha khmat ka ophis jong ka MBOSE, Shillong ban dawa na ka sorkar ba ka dei ban thungkam biang ïa ki hadien ba ka la beh kam noh ïa ki ha u snem 2021 namar kim pas ïa ka Meghalaya Teachers Eligibility Test(MTET).
Haba kren bad u President u Babu Birbor Riangtem u la ong ba ka jingbehkam ka sorkar hadien bun bun snem ba ka ki la hikai ka long ka jingknieh noh ïa ka lad kamai jong ki.
U Babu Birbor u la ong “Ka sorkar ka bthah ba ngin pyndep ïa ka D.El.Ed ngi la pyndep, ka dawa ba ngin thoh eksam biang ïa kito kiba ym kot 45 percent ha ka klas 12 ngi la pyndep balei pat kan beh kam ïa ngi namar ha ka por kaba ngi leit ban sdang hikai kam don kano kano ka jingbthah ba ngin pass MTET”
Haba la kylli pat la ka sorkar ka la ju don ka jingkhot ïakren ne em ïa ki u Babu Birbor u la ïathuh “6 sien u Myntri Rangbah u la khot ïakren hynrei ka jingiakren ka kut beit ba un dang eksamin ia kane ka kam bad u Myntri ka tnad pule puthi pat 2 sien hynrei u Myntri ka tnad pule lei u beh pynban ïa ngi ba ngin leit sha kiwei ki jylla ban leit wad jingtip halor kane”
“Ha kiwei ki jylla ki sorkar ki pynlong da eksamin ba kyrpang kiba ïa syrïem kum ka MTET ha Meghaghalaya bad ka jingthung kam pura ïa ki nonghikai contract kiba la hikai slem” u la ong.
U Babu Birbor u ong ba ka jingdawa ba dei ban thungkam biang ïa kine ki nonghikai khnang ba ka ïing ka sem jong ki kan ym ïap thngan.
U Babu Birbor u la ïathuh ruh ba kiba bun ki nonghikai kiba la shah beh kam noh kin ym lah satia ban wad da kiwei pat ki kam namar ki la palat ka rta wad kam wat ban thoh MTET ruh ngin ym lah shuh namar ka rta jong ki ka la tam ka rta .
Kat kum ka jingïathuh u Babu Birbor ki don kumba 800 tam eiei ki nonghikai kiba la ngat ha kane ka apot.
Ha kane ka jingiakhih la sakhi ruh ba ki don katto katne ngut ki nonghikai kiba kyllon ïapler hapdeng ka jingpyrshang jong ki ban leit tur beit ban leit pynlong jingïakhih ha Parking Lot ha syndah ka Additional Secretariat bad ka jingïa pyni bor bad ki bor pulit. Ki bor pulit lem bad ki bor synshar District ki la pyrshang ruh ban thep ïa kine ki nonghikai hapoh ki bos hynrei ki la pyneh triang ban shong beit ha kane ka jaka kaba don ha surok ban leit sha St Anthony’s College haduh ba ki pulit bad ki bor synshar District ki hap pyndem tuiñ ha khmat ki nonghikai.
Ha kaba ïadei bad ka jingshah pynkynriah jaka jong ki nawei shawei u Babu Birbor u la ong, “Nga sngew ba ngi long kum ki masi ki blang kiba shuh shah leh katba mon. Na phalor jong ka ïing sah u Myntri Rangbah la bthah ba ngin leit sha Parking Lot kaba don ha syndah ka Additional Secretariat hynrei tang ha jan ka ophis MBOSE ngi la shah bat don da kaba hukum ba ngi dei ban shong ha lynti ïaid kjat kaba don ha syndah ka station jong ka All India Radio Shillong. Dei ynda ngi la wan kynduh bad ka DC ba ka la ai jingbit ba ngin shong ngin thiah hangne ha khmat ka ophis MBOSE”