Yn khlieh u CS barim ïa ka Sixth Meghalaya Pay Commission, ïoh por 8 bnai ban pyndep

0

Shillong, Naiwieng 19 : U Myntri Rangbah ka Jylla Conrad K Sangma hynne ka sngi Palei u la pynbna ba ka Kynhun Myntri ka la mynjur ban thaw ïa ka Sixth Meghalaya Pay Commission ïa kaban khlieh da u Chief Secretary barim ka Jylla, Bah DP Wahlang ryngkat ki dkhot ba kynthup ïa ki ophisar rangbah ba la shongthait ba kynthup ïa u Bah Lyngwa bad Ambrose Marak.
Haba pynbna ïa kane ka rai, u Sangma u la ong, “Nga sngewkmen ban pynbna, khamtam eh na ka bynta ki nongtrei sorkar jong ka jylla, ba mynta ka sngi ngi la thaw bad mynjur ïa ka Sixth Meghalaya Pay Commission.”
Shuh shuh u la pyntip ba ka Commission ka ïoh por phra bnai ban pyndep ïa ka kamram jong ka, katkum ki Terms of Reference kiba la buh ha ka jingpynbna.
U Myntri Rangbah u la pynpaw ba ka sorkar ka sngewthuh ïa ki jingkhuslai bapher bapher jong ki nongtrei sorkar bad ka la pynthikna ba baroh ki jingdawa bad jingai jingmut jong ki yn sa pynpoi sha ka Commission.
“Ki jingkhuslai jong baroh ki nongtrei sorkar yn sa pynpoi sha ka Pay Commission, bad ki nongtrei sorkar ruh ki lait ban leit ïakynduh ïa ka Commission ynda ka la sdang treikam,” u la ong.
U Sangma u la batai ba watla ym shym la lah ban kynthup ïa baroh ki mat ha ki Terms of Reference ba nyngkong, hynrei ka sorkar ka la buh ïa ka kyndon kaba ailad ban pynrung shuh shuh ïa ki mat kiba donkam ha kano kano ka por.
“Watla ha ki Terms of Reference ngim shym la lah ban kynthup lut ïa baroh ki mat namar kan jrong palat, hynrei ngi la buh ïa ka kyndon kaba ailad ïa ka sorkar ban pynrung ïa kiwei pat ki mat hadien habud,” u la ong.
U la bynrap ba kane ka jingpynbeit kan ai lad ïa baroh ki jingdawa jong ki nongtrei sorkar, kynthup ïa ki arrears bad kiwei pat ki mat kiba dang sahteng, ban poi sha ka Commission bad ban shah bishar bniah.
Haba pynshai shuh shuh halor ka jingsdang jong kane ka kam, u Myntri Rangbah u la ong ba ka rai ka wan hadien ba ki nongtrei sorkar ki la pynpaw ïa kane ka jingdawa ha ka Public Darbar kaba la long ha State Guest House kumba ar bnai mynshwa.
“Hadien kata ka jingïakynduh, nga la bthah mardor ban sdang ïa ka jingpynkhreh bad ka rukom jied ïa ki briew kiba biang ban shimti ïa ka kam Chairman,” u la ong.
U Sangma u la pynpaw ïa ka jingsngewkmen ba hadien bun ki jingïatai, jingïakren bad jingïasyllok, ka Kynhun Myntri ka la mynjur ïa ka jingthaw ïa ka Sixth Meghalaya Pay Commission, kaba yn treikam hapoh ka jingïalam jong u Bah DP Wahlang.

Leave A Reply

Your email address will not be published.