Pulom ka jingthmu ka KHBBA ban tur sha Secretariat ba shah pynkylla lynti ïaid
Shillong, Naiwieng 18: Ka jingthmu jong ki dribar bos kiba don hapoh ka shatri Khasi Hills Bazar Bus Association (KHBBA) ban ïaid shaduh Secretariat kala pulom noh hadien ba ki bor pyniaid District kim shym la shah satia ïa ki ban tur shaduh Secretariat.
Kane ka jingiaid paidbah jong ki dkhot ka KHBBA kaba la sdang na ka jaka bos kaba don ha Iew Mawlong bad kila iaid lyngba ka Motphran, Them Bijoy bad ka Old Anjalee Petrol Pump bad kane ka jingïai paidbah ka long ban maham ba kan sa pynjur ïaka jingiakhih lada ka sorkar ka dang leh mynthi ïa ka jingdawa jong ki.
Haba kren sha ki lad pathai khubor u Bah Kyrshan Rynjah uba dei u General Secretary u la ong, Ha ka jingshisha kila pan jingbit na Mawlong Hat sha Secretariat hynrei por ba ai jingbit ki pynkylla noh ïa ka lynti iaid.
Kila pyniaid ïa ngi na Mawlonghat sha Motphran sha them bijoy ha Anjalee bad wan biang ha kane ka jaka ïeng ki bos.
Shuh shuh u Bah Kyrshan u la ong bad aw ka lah ban long ba ka jingbym ai jingbit ban ïaid paidbah sha Secretariat ka lah ban long namar ba ki la ïohi kumno kiwei pat ki rally ki long haba la shah ïa ki ban ïaid paidbah sha Secretariat.
U Bah Kyrshan u la ong ba ha ka 17 tarik ki lah shong jingïalang bad u Director jong ka tnad Urban hynrei ka jingïalang kam shym long kaba sei soh namar ba ka jingkhot ïa ngi ka shu long pynban ban khroh ïa ngi ban mih noh na kane ka jaka hynrei ngim shym treh bad ngi ïai neh beit bad kane ka jaka ba nyngkong.
Ka jingai jaka jong ka Urban ïa ngi kadei ha khrum jong ka jaka pynieng kali pyrshah ïa ka Amjalee Cinema bad nangne sha khmat ngan sa nang shim ki sienjam lada ka sorkar kam sngap ïa ki jingtyrwa jong ngi.
U Bah Kyrshan u la ïathuh ba ka sorkar kala ai por haduh ka 25 tarik mynta u bnai Naiwieng ban kynriah noh.