Leit ai mynsiem ka VPP ïa ka JAC ba ïakhih pyrshah Ropeway ha mot Kiang Nangbah

0

Shillong, Naiwieng 18 : U President jong ka Voice of the People’s Party (VPP) bad MLA Nongkrem, Bah Ardent Miller Basaïawmoit, u la leit ban kynduh markhmat ban pynpaw ïa ka jingkyrshan kaba pura ïa ki longkmie hapoh ka lama jong ka Joint Action Committee kiba dang bteng mynta ïa ka jingïakhih pyrshah ïa ka projek ropeway ha Lum Shyllong.
Haba kren sha ki lad pathai khubor, u Bah Ardent u la ong ba ka jingwan jong u ban ïakynduh ïa katei ka kynhun ki longkmie ka long ban pynpaw ïa ka jingïatylli bad ai mynsiem ïa ki ha ka jingïakhun jong ki pyrshah ïa katei ka projek.
“Ka Sorkar ka dei ban sngap ïa ka jingdawa jong ki longkmie bad pynkynriah ïa katei ka projek, namar ki paidbah nongshong shnong jong katei ka thaiñ kim pdiang ïa ka jingpyntrei ïa ka Ropeway Project,” u la ong.
U la pynpaw ruh ba ka Sorkar kam dei ban pyntrei ïa kano-kano ka projek ha kano-kano ka jaka lada ki paidbah nongshong shnong jong katei ka thaiñ ki pyrshah ïa ka.
Haba jubab halor ka jingkynnoh jong ka Sorkar ba ka jingïakhih pyrshah ïa ka Ropeway Project ka don ka lyer politik ka jubab kaba u Bah Ardent u ai ka long, “Kane kam dei ka sien kaba nyngkong ba ka Sorkar MDA ka kynnoh ïa ka VPP ba ka donkti ha ki jingïakhih paidbah.”
U la kynnoh ba ka Sorkar ka pyrshang ban pynjah burom ïa ka VPP da kaba pynngat ïa ka kyrteng jong ka party ha man la ki jingïakhih, kynthup ïa ka jingïakhih ba la pynlong da ka GTF.
U la ong ba kane ka jingkynnoh ka pyni tang ïa ka jingsheptieng jong ki nongïalam ka Sorkar MDA ïa ka VPP namar ba ki ïohi katba nang mih ki sngi ka nang khlaiñ bad ïoh jingkyrshan na ki paidbah.
Shuh shuh u la ong ruh ba ka party ka wan ban ai jingkyrshan ïa kitei ki longkmie, ym ban shimti ne knieh ïa ka bynta jong ki ha kane ka jingïakhih, hynrei ban ïatreilang bad ki lada ki longkmie ki mynjur khnang ban pynbor ïa ka Sorkar ban kohnguh ïa ka jingdawa jong ki.

Leave A Reply

Your email address will not be published.