“Pynbam kruiñ ïa ka pule puthi ha ka Jylla” dei ki jingkren beiñ ïa ki nonghikai: KJDTSA
Bteng ka jingïakhih KJDSTA, Mawkyrwat Zone
Mawkyrwat, Naiwieng 17: Ka Khasi Jaiñtia Deficit School Teachers’ Association (KJDSTA), Mawkyrwat Zone, ryngkat bad ka Garo Hills Deficit School Teachers’ Association (GHDSTEA), ki dang bteng ïa ka jingïakhih shong kyllaiñ mungor (Dharna) kaba ar sngi lynter, naduh mynta ka sngi ka 17 bad 18 tarik u Naiwieng, 2026, kum ka dak jong ka jingïatylli bad ka Central Body, ban dawa ïa ka jingpynurlong ïa ki jingdawa bad ki jingeh kiba la slem bha jong ki nonghikai deficit school.
Kane ka jingïakhih jong ki ka long ruh ban pynpaw bad pynsngew biang ha ka sorkar jylla ïa ki bun tylli ki kam kiba sah teng kiba kynthup ïa ka Centralised Provident Fund (CPF) and National Pension System (NPS) bad ka jingtreikam jong ka scheme 2023 ym jong ka scheme 2026, bad ka CPF ki nonghikai ki dei ban ïoh 10 percent ka (contribution), pynban ki ïoh tang 8 per cent bad kiwei de ki mat jingdawa.
Ha kajuh ka por ka Association ka pynpaw ba kine ki jingdawa ki long kiba donkam bha na ka bynta ka bha ka miat bad ka lawei jong ki nonghikai. Ka jingbym pynbeit ïa kine ki mat ka ktah ym tang ïa ki nonghikai kiba mynta hynrei ha ki pateng ki ban sa wan ka lah ruh ban ktah ïa ka rukom ai jinghikai bad ka jingpynneh ïa ka pule puthi ha ki skul Deficit.
Ka KJDSTA Mawkyrwat Zone ka pynpaw ruh ka jingsngewsih bad pynrem jur halor ka jingkren u bah Prestone Tynsong kum u Symbud Myntri Rangbah ka jylla ba ula kynnoh ba ki nonghikai Deficit Skul ki dei ki ‘kruiñ’, namarkata ki nonghikai ki dawa ban panmap ïa u Prestone Tynsong bad ruh ban pynduh noh ïa ka kyntien kaba u la kynnoh ba ki nonghikai Deficit skul ki dei ki kruiñ namar kane ka jingkynthoh pyrshah ïa ki nonghikai ka la long thik kumba i beiñ bad ñiew beiñ ïa ki kum ki nonghikai.
Ka Association ka kyrmen ba lyngba ka jingïatylli, ka jingïasngewthuh jingmut bad ka jingïeng-tylli, yn sa lah ban pynïoh ïa ki ïa ka hok na ka bynta ki nonghikai skul Deficit hapoh jong ka Jylla Meghalaya baroh kawei.
Ïa kane ka jingïakhih shong kyllaiñ mungor kaba ar sngi ha Mawkyrwat Zone la lamkhmat da u Bah Nicholas Tympuin, President, bad u Bah R. Marbaniang, Secretary jong ka Khasi Jaiñtia Deficit School Teachers’ Association (KJDSTA), Mawkyrwat Zone, ha ka jingdonlang u Bah W.L. Snaitang, uba la shongthait na ka kam hikai, ryngkat bad kiwei pat ki nonghikai kiba mihkhmat na ki skul bapher bapher kiba don hapoh ka jingïalam jong ka Association.