Pynkut ïaka jingpang TB pynim ïaki mynsiem ka thong haka jingrakhe ïaka World Tuberculosis Day

Nongpoh, Lber 24: Ka ophis jong ka District Tuberculosis Officer Ri-Bhoi District mynta ka sngi kila shimbynta ban rakhe ïaka World Tuberculosis Day da ka thong ban rat diengkhong ïa katei ka jait jingpang kaba la sar ïa kiba bun ki paidbah haduh kine ki sngi da ka thong pynkut ïaka jingpang TB pynim ïaki mynsiem.
Ïa katei ka jingrakhe la pynlong ha Science Hall Nongpoh ha kaba u Mayral Born Syiem MLA ka Nongpoh u la shimbynta kum u kongsan haka jingdonlang u Bah Balajied Ranee MDC, Arpit Upadhaya Deputy Commissioner ka Ri-Bhoi District, Dr M Syiemlieh DMHO, Dr P Chyne Medical Superintendent Civil Hospital Nongpoh bad kiwei kiwei ophisar naka tnad ka koit ka khiah, ki paidbah lem bad ki khynnah skul kiba la ïashimbynta haki jingïakop bapher bapher.
Naka liang ki Doctor bad Ophisar ka tnad ka koit ka khiah haba kren ha katei ka sngi kila ong ba ka jingpang TB ka dei kawei naki jait jingpang kaba ma lada ki paidbah kim sumar bad phikir haka por kaba biang kaba lah ruh ban lam sha ka jingïap.
Kane ka jingpang ka dei ruh kaba la don bun snem hynrei naka liang ka tnad ka koit ka khiah bad ka kynhun ki doctor haduh kine ki sngi ki dang ïakhun pyrshah ïa katei ka jait jingpang ban pynduhjait ïaka ha kaba kila batai shai ba kumno katei ka jait jingpang ka saphriang bad kumno ban sumar ïaka ha kaba ki paidbah kim dei ban kheiñ sting hynrei ban sumar bad leit sha ki jaka sumar ba hajan eh jong ki namar ka sorkar ka ai ei ïaka jingsumar, ki dawai ban dih ban pynkoit ïa katei ka jait jingpang.
Naka liang u Bah Mayral Born Syiem kum u kongsan haba kren ha katei ka sngi u la ong ba katei ka jait jingpang ka dei kaba lah ban sumar bad bun ki briew ki koit ïaka watla ki bun ruh kiba ngat ïaka hynrei ki paidbah ki dei ban phikir ban sumar ïa katei ka jait jingpang bad kyrmen skhem ruh ba ki doctor shen kin sa lah ban pynduhjait ïa katei ka jait jingpang kumba long ka jingpang Nianglyngkut ha ki snem kiba la leit noh bad ka Ri-Bhoi kadei kawei naki district kaba la shah ktah jur ha katei ka jingpang hynrei namar ka jingtrei shitom jong ki doctor bad ka tnad ka koit ka khiah mynta katei ka jingpang kala duhjait noh bad kyrmen skhem ba kane ka jingpang TB ruh yn sa lah ban pynduhjait noh shen.
Ha katei ka sngi la sam ruh ki khusnam sha ki khynnah skul kiba la shim bynta haki jingïakop kyntip ktien, Extempore speech bad kiwei kiwei bad kumjuh ruh sha ki nongtrei ka tnad ka koit ka khiah kiba la trei shitom ban ïakhun ïa ka jingpang TB kum ka jingai mynsiem ïaki.