Shillong, Naiwieng 14: Ka Sorkar Jylla mynta ka lah shim ïa ki sienjam na ka bynta ban pynkhreh ban pdiang ïa ka National Games 2027, da kaba pynkhreh ban shna thymmai ïa ki surok bad kumjuh ruh ïa ki kam ban maramot ïa ki surok.
U Bah Prestone Tynsong uba dei u Symbud Myntri Rangbah uba dei ïa ka tnad PWD u la ong, ba ki Work Order kiba kot T.45 Klur lah dep ban ai ban shna thymmai biang ïa ki surok ha Shillong hapoh jong ka Central Division.
U Bah Prestone u la ong ngi lah dep ban ai, ïa ki Work Order kumba T.45 Klur ban shna thymmai ïa ki surok ha Shillong, kiba hap hapoh jong ka Central Division bad bynrap ba ula dep bthah ïa ka Bypass Division ban pynkhreh ïa ki Estimate na ka bynta ki kam maramot, kynthup ïa ka National Highway.
U Bah Tynsong ula ong ba ka sorkar ka ïengskhem ban pynthikna ba ki jingpyniasoh lyngba ki surok ha ka nongbah Shillong bad ha ki jaka kiba marjan bad ka Shillong kin dei kiba la pynkhreh bad pynbit pynbiang shwa ka National Games.
