Kwah ka IHCL ban pynneh ïa ki riti dustur jong ka jylla, panmab na ka HYC ba thoh Barapani ha jaka Umïam

Shillong, Naiwieng 14: Ka Indian Hotels Company Limited (IHCL) ka la phah ïa ka shithi sha u President ka seng HYC u Bah Roy Kupar Synrem ban pan mab ïa ka jingbakla ha kaba kila kumthoh Barapani ha ka jaka ban thoh Umïam.
Ha ka shithi kaba la phah na ka liang jong ka IHCL ka la kubur ïa kaei kaba la mih ka kyrteng Barapani ha ka kyrwoh khubor kaba ki la pynmih ha ka 12 tarik Naiwieng, 2026 kum ka jingpyntip ba kin sa ïa soi ïa ka soskular ban shna ïa ka Taj Resort ha ka jylla Meghalaya.
Ka IHCL ka la pan mab na ka bynta ka jingthoh bakla ïa ka kyrteng “Barapani” ha ka jaka ba kin thoh Umïam, na ka liang jong ka kompeni ka burom ïa ka jingsngew jong ki trai shnong bad ki riti dustur kaba ki don.
Kumta ka IHCL da kaba burom ka la ithuh bad tip ïa kaba ïa ka kyrteng “Umïam” kan pynneh pynsah namar ba ka long kaba ktah shibun ïa ki paidbah riewlum jong ka jylla Meghalaya.
Ka Umïam Hotels Private Limited ka kular ban burom ïa ka riti ka dustur bad kiwei kiwei kiba dei jong ka jylla Meghalaya. Haba kren shaphang kane, ka la ong ba kane ka projek ka pyni jngai ym tang ha ka ban bei tyngka ha ka ban tei ïa ka kam jngohkai pyrthei hynrei ban pyni ruh ïa ka jingriewspah kane ka jylla ha ka jingitynnad jong ka ha ka liang ka mariang bad kiwei kiwei ki jingitynnad jong kane ka thaiñ.
Ka la pynshai ruh na ka liang jong ka Umïam Hotels Private Limited kam ju don kata ka jingmut ban pynkylla ïa ka kyrteng jong ka Umïam. Ha ka jingshisha, ka kompany jong ki ka pynpaw ïa ka jingïadei kam bad ka jingburom ïa ka Umïam.
Ka la pynsngew ïa kane ka mat kaba la pynpaw da ka seng HYC bad kan sa shimkhia ïa kane bad ka IHCL khnang ba ka kyrteng “Umïam” kan neh beit ha kino kino ki projek ban wan bad kiwei kiwei.
Kala don ka jingsngew na ka bynta jong ki paidbah kane ka thaiñ bad kala kular ba kan ïai bteng ban pynlong ïa la ki kam ki jam da ka burom kaba khraw eh ïa ki briew, ka riti ka dustur bad ka jinglong jong ka Meghalaya.