Hadien bun ki jingeh ïoh ka skul ki jingtei thymmai ba 25 lak na ka MLA skhim 17th North Shillong

Shillong, Naiwieng 13: Ka St. Dominic Higher Secondary School Mawkhar Shillong ha ka sngi Palei ka la ïoh ban plie ïa ka jaka leitbar, ka jaka sait kti, ka kynroh kaba la shna pynbha thymmai, ka septic tank, ka Soak Pit bad ka nala kaba ïasnoh lang ïa u pud u sam jong ka St. Joseph’s Church Mawkhar Parish bad ka nala jong ka Dorbar Shnong Mawkhar bad ïa kine ki jingtei ba thymmai la bei pisa lyngba ka MLA skhim SUWP u snem 2023-24 bad snem 2025-26 bad ïa kitei ki jingtei la plie da u MLA ka 17th North Shillong Constituency u Bah Adelbert Nongrum ha ka jingdonlang u Parish Priest u Rev Fr. Leo Ïawbor, u Principal ka skul u Rev Fr Bensar Kharsati, ki dkhot ka School Managing Committee, ki nonghikai, ki khynnah skul, u Secretary ka Dorbar Shnong Mawkhar bad kiwei kiwei.
Haba kren shwa ban plie ïa kitei ki jingtei, kum u kongsan, u MLA u la ong ba kum u nongthaw aiñ u pyrshang katba lah ban sam hok ïa ka MLA skhim kaba ki paidbah kidei hok ban ïoh bad u la kyntu ïa ki khynnah skul ba kin trei shitom ban long ka lawei baphyrnai.
U la ong ruh ba ka skul ka la leh ïa kaba dei naba ka la pan ïa kaba donkam ym ïa kaba ki kwah bad u la ai khublei ïa u Principal barim u Rev Fr Andreas Pariat bad pynpaw ruh ba kane ka jingïoh ban plie ïa kine ki jingtei ka long shi bynta na ka jingrakhe ka Parish ïa ka platinum jubilee mynta u snem.
Na ka liang u MLA haba phai sha ka jinglong jingman jong ka jylla khamtam ha kine ki por kiba mynta, u la ong ba ka la nang hiar arsut hajan baroh ki liang bad u la kyntu ruh ïa ki khynnah skul ba ki dei ban long kiba stad ban pyndonkam ïa ka mobile phone bad ïa ka social media.
U la pynpaw ruh ka jingai khublei ïa ki nonghikai naba ki long ki païa ïa ka jingim ba phyrnai jong ki khynnah bad kyntu ruh ïa ka managing Committee ba kan nang lah ban trei shitom ban kyntiew ïa ka skul na ka por sha ka por.
“Kum ki briew ngi dei ban skhem ha ka jingngeit ban khlaiñ ki jingduwai bad kumjuh ruh ban leh barabor ïa ki kam kiba bha bad ban ïeng skhem ha la ki nongrim bad khamtam eh bym dei ban ïapeiñ ïa kino kino kiba wanrah jingkylla dur ki bym ïahab hapoh ka imlang sahlang, ha ka skul bad ha ka jylla baroh kawei,” ong u MLA.
Haba kren shaphang ka sngi kyrpang jong ki khynnah, u Bah Nongrum u la ong ba ïa kane ka sngi la ithuh ruh ha ka pyrthei baroh kawei da kaba pyndon ruh ïa ki kyndon jong ka hok jong ki khynnah ha ka imlang sahlang bad ka UNICEF ha u snem 1953 ka la trei haduh mynta na ka bynta ka bha ka miat ki khynnah ha ki ri ka pyrthei baroh kawei bad ba ka 20 tarik u Naiwieng ka dei ka sngi ba ka United Nations General Assembly ka la pynmih ka jingpynbna ka Declaration of the Rights of the Child (1959) bad ka Convention on the Rights of the Child (1989).
Katba u Principal u la pynpaw ïa ka jingai khublei ïa u MLA uba ïarap ban pynïoh skhim kaba la kot T. 25 lak halor kine ki jingtei bad pynpaw ruh ka jingïaroh ïa ki jingleh rit u MLA uba la phah ïa la ki khun ban wan pule ha kane ka skul kaba ym ju kham jia koit, naba bun ki phah shabar jylla ne sha kiwei pat ki jaka pule.
Ka skul kaba la rakhe ïa ka sngi kyrpang ki khynnah skul ne ka Children’s day, u Principal u la ong ba ka jingwan plie u MLA ka long kum ka jingai sngewbha ïa ki khynnah skul naba ha ki por mynshwa ki mad ïa ki jingeh namar ki jaka leitbar, kim biang, ka septic tank kam biang naba ka la rit bad ba hap ban phah tong noh ka jakhlia bad ïathuh ruh shaphang ki jinglong jingman, ki dur ki dar ha ka por mynshwa ba dang shna ïa ki jingtei tad haduh ban da ïoh plie thymmai ha kane ka sngi.
Ha kane ka sngi la don ki prokram na ki khynnah, ka jinglam phang na ki nonghikai bad kiwei kiwei bad la pynkut ïa kane ka sngi da ki prokram na ki khynnah skul kiba rakhe ïa ka Children’s Day.