Kem ding ka dukan die uniform shipai bad pulit ha Baridua, julor lut ki tiar bad ki jaiñ ki nep

Nongpoh, Naiwieng 09: Kawei ka dukan kaba die ïaki jaiñ uniform bad ki tiar shipai bad pulit kala kem ding kynsan hynnin ka miet haduh baroh ki jingdon jingem ha katei ka dukan kila julor kaba la wanrah ruh ka jingduhnong kaba khraw ïa u trai dukan.
Katkum ka jingtip bala ioh lum la ong ba kane ka jingjia kala jia haka por kumba 10 baje eiei ïa kaba ym pat lah ban tip thikna ka daw tynrai jong katei ka jingjia, katba ka ding kala ioh ban klang bad bamduh baroh ki tiar ki tar naduh ki jaiñ ki nep haduh ban da kylla dpei.
Ki pulit ka Khanapara Police Station kila poi mar mar sha katei ka jaka ryngkat ki pulit pynlip ding ban tem ïa katei ka ding kaba klang, bad naka liang ki pulit ki dang pynlong ka jingtohkit halor kane ka jingjia ban lap ïaka daw tynrai.