Pynskhem u OC ka Nongpoh PS ïa ka VDP Umpathaw bad pynsngewthuh halor ka jingma na u drok

Nongpoh, Naiwieng 08: U Officer-in-Charge jong ka Nongpoh Police Station, u Bah P. Syiem, ryngkat bad ki pulit jong ka thanat Nongpoh, haka 7 tarik Naiwieng ki la ïashim bynta ha ka prokram pynsngewthuh paidbah kaba la pynlong da ka Umkon IVCS halor ka jingma jong u drok bad kiwei kiwei ki jingdih buaid.

Ha kane ka prokram, u Bah P. Syiem, kum u resource person, u la ai jingkren halor ka phang “drug abuse” (ka jingpyndonkam bakla ïa ki jingdih pynbuaid), ha kaba u la batai ïa ki jingktah basniew jong ka jingdih drok ïa ki briew shimet, ki longïing bad ka imlang sahlang hi baroh kawei. U la ban jur ruh ïa ka jingdonkam jong ka jingpynsngewthuh paidbah, ka jingïashim bynta jong ka imlang sahlang bad ka jingïatreilang jong baroh ban ïakhun pyrshah ïa kane ka jingma kaba ktah ïaki samla bad ka imlang sahlang.

Hadien kane ka prokram, ka kynhun pulit ka la leit ruh sha ka shnong Umpathaw ban pynskhem ïaki VDP kiba la thaw thymmai ha katei ka shnong bad la ai jingbatai bad pynshai sha ki dkhot ka VDP kiba dang shu shah pynskhem halor ka rukom thaw ïa ka kynhun, ki bor, ki kamram bad ki bynta jong ka VDP kumno ban tehlakam ïaki kam sniew ban wanrah ïaka shongsuk shongsaiñ bad ka jingshngaiñ haka shnong ka thaw.