SHILLONG, Naiwieng 4: U nongïalam bad MLA ka BJP, u Bah Sanbor Shullai, u la ong ba ka BJP ka la shah kyntait ha ka jingpynrung myntri sorkar dang shen bad ba ka NPP kam shym la ïamir jingmut bad ka paralok ba ar ba heh tam jong ka ha ka sorkar.
Ha ka kyrwoh khubor, u Myntri sorkar u la ong ba ka party kaba don 10 ngut ki MLA ka dei hok ban ioh shuh shuh ia ki shuki myntri, ka jingdawa kaba la dep ban rah ha u Myntri Rangbah ka Jylla hadien ba u heh ka UDP u bah Metbah Lyngdoh u la iehnoh ia ka kam.
U Bah Shullai u la ong ba ka BJP kam don kano kano ka jingpyrshah ia uno uno u MLA ka NPP ban shah thung kum u myntri, hynrei ka jinglong jong ka party kum kaba ar ha ka jingbun ki MLA la dei ban burom.
“Ka BJP ka la ju don ha syndah jong ka NPP wat ha ka por ba ka don ha ka jingeh ha u snem 2023 ha kaba baroh ki seng sain pyrthei ki kwah ban thaw ia ka sorkar synrop bym dei ka NPP,” u la ong.
U la ong ba katba ka sorkar MDA ka ioh ia ka jingiarap bad jingkyrshan baroh na ka BJP ha Delhi, hynrei ka jingshah kyntait jong ki MLA ka BJP da ki nongialam ka NPP kam dei ka dak kaba khlain na ka bynta ka jingiateh lok.
U Bah Shullai u la ong ba ki MLA ka BJP ha ka sngi Balang ki la iakynduh ia u co-incharge ka Northeast u Rajiv Babbar bad ki la pyntip ia u shaphang ki jingjia ba thymmai ha ka sain pyrthei bad kumno ka BJP ka shah kyntait ha ka jingpynkylla bad ka bhah kam.
U la ong ba ia kane ka kam yn sa rah sha ki nongialam ha Delhi shwa ban ai ia kano kano ka rai kaba khatduh.
Utei u nongialam ka BJP u la ong ba u la dep ban iakynduh ia u Myntri Rangbah ka Jylla bad ia baroh arngut ki Deputy Chief Minister katkum ka jingbthah jong ka party bad u la kwah ban don ka jingialang bad baroh ki MLA ka BJP ban pynbeit ia katei ka kam.
Ha ka jingthmu ban pynbha ia ka jingiadei hapdeng ki ar tylli ki paralok ne partner ba iatreilang la pyntip ruh sha u CM da u State President jong ka Party, u la bynrap.
