Khliehriat naiwieng 04: Ki la don haduh 35 ngut ki samla na kylleng ka Rilum Jaiñtia kiba la pyndep ianka jingshah hikai pyntbit halor ka Landscaping & Earthmoving Techniques Using JCB ne ka rukom ot khyndew bad ban pynryntih ïa ki jaka bad ban pynkynriah ïa ka khyndew da kaba pyndonkam da ka puh shilum.
Ïa kane ka jingshahhikai la pynlong da ka Deen Dayal Upadhyay Community College (DDUCC) for Skill Development, Wahiajer, kaba dei ka kolej hapoh ka North-Eastern Hill University (NEHU).
Ïa kane ka prokram aijinghikai, la pynlong naduh ka 26 tarik Risaw haduh ka 3 tarik Naiwieng da ka jingthmu ban ai sap treikam ïa ki samla lyngba ki jinghikai kiba pyntikna ïa ka jinglah jong ki ban kamai jakpoh, seng kam lajong bad kyntiew ïa ka jingim jong ki.
Kawei pat ka thong jong kane ka prokram ka long ban pynbha biang iaka lynti ba rim, kaba iaid lyngba ka campus jong ka Deen Dayal Upadhyay Community College.
Katkum ka histori, la ong ba kane ka lynti, la ju pyndonkam da u Syiem Jaintiapur ban leit sha ka Durga Temple bad ki mawbynna ha ka shnong Nartiang.
Baroh 35 ngut ki nongshim bynta ki la ioh jinghikai lyngba ki jingbatai bad ki jingpyni iaki rukom pyntreikam ïa ka puh shilum, da u nonghikai Ma Jaimi Lyngdoh.
Haba kren ha ka jingïalang pynkut kum u kongsan u Ma Ransom Sutnga, Technical Adviser, Meghalaya Legislative Assembly, u la ban jur ïa ka jingdonkam jong ka jinghikai pyntbit ban iarap ïa ki samla ban ïakhun pyrshah ïaka jingkyrduh kam. Ula kyntu ïa ki nongshim bynta ba kin iai kyntiew ïa la ki sap treikam, pdiang ïa ki teknoloji thymmai bad trei shitom ha ki kam kiba ki la jied.
Nalor u kongsan ha kane ka sngi la donlang ruh u Dolloi ka Elaka Nartiang Ma Salong Lamare, u Ma L. S. Bareh, University Engineer, NEHU, u Dr. F. R. Sumer, Principal-in-Charge ka DDUCC, u waheh shnong Wahiajer Ma Santwotki Laloo bad u Prof. H. Lamin (Retd.) Founder Principal-in-Charge ka DDUCC.
Hadien ka jingialang u Ma Ransom Sutnga u la plie paidbah ruh ïa ka lynti kaba la pynbha biang da ki nongshim bynta kum shi bynta jong ka jinghikai kaba ki la ioh.
Ha kane ka sngi la sam ruh ïa ki syrnot sha baroh ki nongshim bynta bad iaka jingialang la pynwai da ki kyntien khublei na u Ma Wolnish Rymbai, Programme Co-ordinator.
