Lap ka KHNAM bymkhuid ka rukom aikam ka MUDA ban pynïaid ïa ki 3 tylli ki jaka leit shabar

Shillong, Naiwieng 03: Ka Khun Hynñiewtrep National Awakenning Movement (KHNAM) CEC hapoh ka jingïalam jong u Working President u Bah Thomas Passah ka la leit ban jurip ïa ki jaka leitbar kiba la pyntrei da ka tnat Meghalaya Urban Development Authority ka la lap ba ka la don ka jingbym ïaid beit ïaid ryntih ka rukom ai ne alot ïa ki tender jong ka ha kaba ïadei bad ki jaka leitbar paidbah.
Hadien ba la dep ban jurip ïa ki 3 tylli ki jaka leitbar ha ka sngi baar na ka liang u nongïalam ka KHANM u la ïathuh ba la lap ba ka jingai tender kam long kaba shai bad u la ong, “Hadien ba la dep ban kynduh ïa u Secretary bad la ïathuh ba ka tnat ka la dep ban khot ïa ka tender ha u Naiwieng 2025 hynrei ïa ki tender document khlem da la plie bad ka la shu neh sah kumto bad la pynïaid da ki departmental bad na ka liang ka seng ka la leit ban jurip ïa kine ki 3 tylli ki jaka la lap ba nongtrei kine ki jaka kim dei ki briew jong ka MUDA bad ki la ïoh da ka contract na ka MUDA bad kane ka don ka jingïapher na ka jingkren ka MUDA bad kine ki briew kiba ap.”
U la kynnoh ruh ba ïa kine ki tender ba la dei ban plie naduh u snem ba la dep la kumno kumno ha u bnai Nohprah hynrei ka tnat ka khlem plied hynrei la shu ai buhrieh ïano re ïano bad kane lah ban ong ba kadei ka rukom treikam kaba long shilliang khmat bad kam long kaba shai.
“Na ka liang ka KHNAM ka kwah ba ka rukom treikam kan dei ban long da ka lynti kaba long khuid ba long suba bad kito ki briew kiba la thep ïa ki tender document ki dei ban ïoh, ai uba ïoh un ïoh ngin pyrshah leh aïu ïa kata bad kam dei ban long ba ïa ki kam ki jam dei ban ai beit tang sha ki briew kiba longheh longhaiñ ne tang ïa kiba ithuh ïa ki nongpynïaid jong ka tnat bad kane ka long kaba bakla bad kane kan lah ban long ka rukom leh kaba naduh mynshwa, kumta ka la dei ka por ban pynkylla noh ïa kine ki rukom treikam, kumta na ka liang ka seng kan sa thoh sha u Secretary ban pynpaw ïa kaei kaba ngi lap bad ngi kyntu ïa ka ophis ba kan plie noh ïa kine ki tender ba kito kiba ïa shim bynta ki la dep ban aiti sha ka MUDA bad ba kan ïaid noh da ka Open tender system kaba khuid ba suba bad ai ba u briew uba dei hok ban ïoh un ïoh,” ong u Working President ka KHNAM.