Lada shongnia ki jingpyrshah ngi long ba la kloi ban ïakren ong u CM ïa kiba pyrshah Ropeway

Shillong, Naiwieng 02 : U Myntri Rangbah ka Jylla, u Conrad K Sangma, u la pynpaw ba ka long kaei kaei kaba sngewsih ban ïohi ba don ki kynhun bad ki briew kiba dang pyrshah ïa ka projek Shillong Peak Ropeway, watla ka Sorkar ka la dep ai jingpynshai halor ki jingsngewkhia kiba la pynpaw.
U la ong ba ka Sorkar ka long kaba la kloi ban ïakren bad pynbeit ïa kino kino ki jingeh kiba shisha bad kiba don nongrim, hynrei ka jingpyrshah tang ba la ïoh ban pyrshah khlem ki daw kiba biang kam dei ka rukom kaba bha ha ka synshar paidbah bad ha ka saiñ pyrthei.
U la ong ba ka Sorkar ka kwah ban tip ïa ki jingsngewkhia kiba dang don bad lada ki long kiba shongnia, ka long kaba la kloi ban ïakren.
“Lada don ki jingeh bad lada ki long kiba shongnia, ngin ïakren bad ngim don jingeh ei ei ha kata. Hynrei phi hap ban pynshong nongrim ïa ki jingsngewkhia jong phi da ki daw kiba shai,” u la ong.
U Conrad u la pynkynmaw ba ka Sorkar ka la pynlut kumba ar snem shiteng ban pynkhreh ïa kane ka projek, ha kaba ki agency kiba don ka jingshemphang ha ka ha katei ka lain ki la bishar bniah ïa ki mat bapher bapher.
U la ong ba ki jingeh kiba ïadei bad ka mariang bad kiwei pat ki mat la dep ban bishar bad pynbeit. U la kdew ruh ba u Commissioner & Secretary jong ki Tnad Industries bad Tourism, ryngkat bad u Managing Director jong ka Meghalaya Tourism Development Corporation (MTDC), ki la dep ai jingpynshai halor ki mat kiba la wanrah da ki kynhun bapher bapher.
U la ong ba ki kynhun kiba la pynpaw ïa ki jingsngewkhia ruh ki la pdiang ba ki jingpynshai kiba la ai ki long kiba shai.
Namarkata, u la ong ba kam don shuh ka daw ban pynsangeh ïa kane ka projek bad dei ban ïaid shakhmat.
U Conrad u la pynpaw ba kane ka projek kan kyntiew ïa ka kam jngohkai pyrthei jong ka jylla sha ka kyrdan kaba thymmai bad kan wanrah ïa ki lad kamai kajih bad ki kam trei kiba bun na ka bynta ki samla.
“Ngi ju kren halor ka jingthaw ïa ki kam trei bad ngi ju ud ba ki samla jong ngi kim ïoh ïa ki kam kiba biang. Kane ka projek kan kyntiew ïa ka kam jngohkai pyrthei sha ka kyrdan kaba thymmai bad ki lad kiba bun bah kin mih na kane ka projek,” u la ong.
U la ong ba da ki spah bad wat ki hajar ngut ki samla kin ïoh ïa ki kam la ka long hangtei lane bad kiwei ki kam kiba don jingïadei bad ka kam jngohkai pyrthei lyngba katei ka jaka.
U la maham ba ka jingpyrshah ïa kane ka projek kan ktah beit ïa ka kamai kajih bad ki lad kam trei jong ki samla.
“Lada phi pyrshah ïa kane ka projek, phi ktah ïa ka kamai kajih bad ki lad kam trei jong ki samla jong ngi. Ngi dei ban kynmaw ïa kata,” u la ong.
U la bynrap ba lada don kino kino ki jingsngewkhia halor ka mariang, ka Sorkar ka long kaba la kloi ban ïakren bad pynbeit ïa ki. Hynrei katkum ka jingtip jong u bad ki jingpynshai kiba la dep ai, ym don kano kano ka jingeh kaba kum kata kaba dang sah.
Haba kren halor ka jingpynsangeh ïa ka kam ha ka jaka jong ka projek da ka Khasi Hills Autonomous District Council (KHADC), u Conrad u la ong ba ka Sorkar kan bud ïa ki kyndon aiñ bad kan shim ïa ki sienjam kiba donkam katkum ka aiñ.