Nga sngewkmen ba ki kynhun baroh ki la ïoh ban syllok bad ka JPC halor ka FCRA : Conrad

Shillong, Jylliew 02 : U Myntri Rangbah ka Jylla, u Conrad K Sangma, u la pynpaw ïa ka jingsngewkmen ba ka Joint Parliamentary Committee (JPC) halor ka Bill FCRA ka la jied ïa ka Shillong kum ka jaka ban pynlong ïa ka jingïalang kaba nyngkong, kaba la ai lad ïa baroh ki kynhun ban pynpaw ïa ki jingkhuslai jong ki.
Haba kren bad ki lad pathai khubor, u Myntri Rangbah u la ïathuh ba u la kyrpad ïa u Chairman ka JPC, u Sanjay Jaiswal, ban wan sha Shillong khnang ba ki seng bapher bapher, kynthup ïa ki seng niam kiba ïoh jingïarap pisa na ki ri na shabar, ba kin ïoh lad ban pynsngew ïa ki jingeh jong ki hakhmat ka Committee.
U la ong ba mar ïa shimti u Sanjay Jaiswal ïa ka kam Chairman, u la phone ïa u bad pynpaw ïa kane ka jingkyrpad, kaba u Chairman u la pdiang bad mynjur ban wan.
Shuh shuh u la ong ba ha ka por ba u dang long MP ha Parliament ha u snem 2016, u la don ka jingïadei kaba jan bha bad u Jaiswal bad bun ngut kiwei pat ki MP. U la ngeit ruh ba u Jaiswal u dei u briew uba biang ban khlieh ïa ka Committee namar ka jingshemphang bad ka jingtip jong u ïa ki kam jong ka ri.
Nangta, u Myntri Rangbah u la ïathuh ba u la ïakynduh ïa ki dkhot ka JPC ha kad liengsuiñ Umroi shuwa ba kin mih na Meghalaya, bad ai khublei ïa ki namar ba ki la wan sha Shillong.
U la ong, “Kaba kongsan ka long ba baroh ki kynhun kiba don jingkhuslai ki la ïoh lad ban pynpaw ïa ki jingsngew jong ki. Nga la ïoh jingtip ba ka JPC ka la sngap bha ïa baroh bad ka la ïakren bniah ïa ki mat bapher bapher. Ka la ai por ruh 15 sngi ïa ki seng bapher bapher ban phah ïa ki jingpynsngew bad ki jingkhuslai jong ki.”
U Conrad u la ong ba kane ka jingïalang ka pyni ïa ka rukom treikam kaba shai jong ka synshar paidbah, namar baroh ki kynhun ki la ïoh lad ban pynpaw ïa la ki jong ki jingsngew bad jingmut.
U la bynrap ba ki dkhot ka JPC ki la pynpaw ha ka jingïakren bad u ha Umroi ba kin peit bniah ïa baroh ki jingai jingmut shuwa ban shim ïa ka sienjam kaba bud.
Ka JPC kan leit mynta sha Chennai bad nangta sha kiwei pat ki jaka ha South India. U Conrad u la pynpaw ïa ka jingsngewnguh ïa u Chairman bad baroh ki dkhot ka Committee namar ba ki la jied ïa ka Shillong kum kawei na ki jaka ban sngap ïa ki jingpynsngew halor ka Bill FCRA.