Shillong, Naiwieng 02: U Myntri Rangbah ka Jylla u Conrad K Sangma uba dei ruh u National President ka (NPP), u la pynthikna ba 3 ngut ki MDC ba mynta jong ka TMC kin pynïasoh pura sha ka NPP ha ka 04 tarik mynta u bnai.
“Ngin sa ïoh ïa ki 3 ngut ki MDC ba mynta jong ka TMC, ki ban wan ïasoh bad ngi ha ka 04 tarik Naiwieng. Kumta ngin sa ïa kren ïa kata ha ka 04 tarik,” ïathuh u Conrad haba kylli halor ka jingkylla ka sainpyrthei ha rilum Garo mynta
Haba kylli halor ki khubor la ka don neem kaba lah ban long ba ki MLA ka TMC ruh kin rung lang sha ka NPP, u Conrad u la ong, “Kam shym la don kum kata ka jingtyrwa jong ki MLA ka TMC ban wan ïasoh bad ka NPP.
“Kam don kum kane ka jingïakren kaba la wan ha nga. To ngin ap bad peit katba ka jinglong jingman ka nang ïaid. Mynta hi ka long ba ha ka 04 tarik Naiwieng, 3 ngut ki MDC jong ka TMC kin wan ïasoh bad ngi,” u la bynrap.
