Ka jingkhlad noh ba kyndit u Rev. Fr John Madur, ka jingduh kaba khraw ïa ka imlang sahlang: VPP

Shillong, Risaw 29: Ka seng Voice of the People Party (VPP) lyngba ka kyrwoh ba la phah da u President u Bah Ardent Miller Basaiawmoit ka pynpaw ka jingsngewsih kaba khraw halor ka jingkhlad ba kyndit jong u Rev. Fr. John Madur. Ka party ka ong ba ka jingkhlad noh jong u kam dei ka jingduh tang ïa ka Balang, ïa ka kynhun ki Khristan hynrei ïa ka imlang sahlang kaba ïar bad ïa kito kiba ïoh ka lad ban tip ïa u shimet bad kumjuh ruh ban kmen ha ka jingïadei paralok kaba ki la sam bad u.
U President u la ong ba ka jingïadei ba shimet jong u ki la long ha kiba bun ki snem. “Ka jingïakynduh kaba ym lah ban klet shuh ha ka jingïakynduh bad u ka long ha ka 31 tarik u Nohprah 1999 katba nga dang long u President jong ka FKJGP. Ngi la ïadonlang ha ka prokram ba la pynlong da ka FKJGP ha YMCA, Mawkhar Shillong ha ka por ba pdiang ïa u snem thymmai (millennium) hapoh ka phang ‘Ka Hok Sha ka Hajar snem bathymmai’ kane ka prokram ka la neh noh ka jingkynmaw kaba kmen kaba la pynlong ruh ka jingsdang ka jingïadei paralok kaba la neh ha ki phew snem,” ong u President ka VPP.
U la ong, “Ngan sa kynmaw ïa u da ka jingburom kaba naduh dohnud bad ka jingsngewnguh ïa kane ka jingïateh ba ngi la ïasam bad ki jingïakren kaba ngi la don ha ki snem ba la leit. Ka jingleit kloi noh jong u sha ki kti U Kynrad ka ieh shadien ïa ka jingduh kaba khraw bad ki jingmut jingduwai jong nga kin don bad ka ïing ka sem, ka Balang bad ïa kito baroh kiba pangnud halor ka jingkhlad noh jong u,” u la pynpaw.
U la ong ba na ka liang jong u shimet bad ha ka kyrteng jong ka VPP u pynpaw ka jingsngewsih kaba khraw bad ai ruh ka jingsngewlem sha baroh kiba shah ktah da ka jingim jong u bad ka ministry. U la ong ba ai ba U Blei Un ai ïa ki ka bor bad ka jingpyntngen ha kane ka por ba dap ka jingsngewsih bad aiba ka mynsiem jong u (L) Rev. Fr. John Madur un ïoh ka jingjah thait bymjukut bad ka jingsuk ha bneng.