Ba sahteng ki mat jingdawa rai ki phra ngut ki MLA ban leit ïasoh sha ka BJP: Bah Mayralborn Syiem

Shillong, Risaw 29 : U MLA ka BJP na Nongpoh, u Bah Mayralborn Syiem hynne ka sngi Palei u la ong ba ka rai jong u ban pynïasoh bad ka Bharatiya Janata Party (BJP) ka long ban wad ïa ki lad ban pynbeit ïa ki mat ba kongsan kiba ka Meghalaya la slem bha ka khlem pat ïoh ïa ka jubab kaba pynhun.
Haba kren bad ki lad pathai khubor, u Bah Mayralborn u la kdew ïa ka jingpynrung ïa ka ktien Khasi bad Garo ha ka Khyrnit Baphra jong ka Riti Synshar ka Ri India, ka kam tih dewïong, ka Meghalaya Resident Safety and Security Amendment Bill 2020 bad ka jingkynriah ïa ka Harijan Colony na Them Iew Mawlong ki long ki katto katne ki mat kiba donkam ban shimkhia.
Haba kren halor ka jingpynïasoh jong ki phra ngut ki MLA bad ka BJP, u Mayralborn u la ong ba ki don ka jingkyrmen ban ïatreilang bad ka sorkar pdeng hapoh ka jingïalam jong ka BJP ban pynbeit ïa kine ki mat.
Shuh shuh haba kren halor ka Foreign Contribution Regulation Act (FCRA) Amendment Bill 2026, u la ong, “Ki seng bad ki kynhun kiba ïoh jingïarap pisa na shabar ri ki dei ban long kiba don ka jingkitkhlieh bad bud ïa ki kyndon. U la pynpaw ruh ba ka rukom pynthymmai ïa ki FCRA certificate ka dei ban long kaba suk, kynthup lyngba ka online.”
U la kyntait ïa ka jingkynnoh ba ka FCRA ka long pyrshah ïa ki Khristan, da kaba ong ba ki kyndon ki dei ban treikam ïa baroh ki kynhun, khlem da peit ïa ka niam. U la pynpaw ruh ïa ka jingshaniah jong u ba lyngba ka BJP, yn lah ban ïada ïa ka imlang sahlang Khristan bad ban pynbeit ïa ki mat ba ïadei bad ka roi ka par.
Haba jubab halor ka jingkylli shaphang ka UDP, u Mayralborn u la ong ba um don jingbitar pyrshah ïa ka UDP lane ïa ki nongïalam jong ka. U la ong ba ka rai jong ki ban pynïasoh bad ka BJP ka long ban pyrshang ban pynurlong ïa ki jingangnud jong ki paidbah.
Halor ka elekshon MLA 2028, u la pynpaw ïa ka jingshaniah ba ki paidbah kin jied ïa ki nongmihkhmat katkum ka jingtrei jong ki bad ka jingnoh synñiang na ka bynta ka constituency. U la ong ruh ba ka jingïasoh bad kawei pat ka seng kam dei kaba thymmai ha ka saiñ pyrthei.
U la pynpaw ba u don ka jingshaniah ba ka BJP kan shimkhia ïa ki mat ba ki la kdew. Hynrei, haba kylli ïa ka sienjam kaba kin shim lada kine ki mat kim urlong, u la ong ba kin shim ïa ka rai ha ka por kaba biang.