Lyngba ka Chief Minister’s Skill Mission lah ban pyntbit ïa ki samla na nongkyndong ban ïohkam ïohjam

Shillong, Risaw 29: Ka jingplie ïa ka jaka jingai jinghikai shaphang ka Basic Computer bad Data Entry Operator ha Chapahati-I kaba hap hapoh ka Chief Minister’s Skill Mission na ka bynta ban pyntbit ïa ki samla na ki shnong nongkyndong da ki jinghikai halor ka digital bad pynbiang ba kin ïoh kam ïoh jam hadien habud bad kiwei pat ki jingpynbiang.
La ong ba ïa katei ka jaka ai jinghikai, la pynlong da ka VLE Society bad ka jingkyrshan na ka Meghalaya State Skill Development Society (MSSDS). La donlang ha katei ka prokram da ki nongai jinghikai, ki kmie ki kpa, ki dkhot jong ka VEC, ki nongpynïaid shnong bad kiwei kiwei ki riew pawkhmat.
Katba ka ophisar jong ka MSSDS Skill Development, Ampati, ka Tesilchi Ch. Sangma ka la kren shaphang ka jingdonkam jong ka jingtip shaphang ka computer ha kum kane ka ïew treikam ha kine ki sngi bad ka la pynshlur ïa ki samla khamtam ïa ki kynthei ba kin pyndonkam ïa ki kabu ban pynroi ïa ki sap ki phong.
Ka ophisar jong ka Zikzak Block Development, ka Torali K Marak ka la ai jingïaroh ïa kane ka jingpynlong ïa ka prokram ai jinghikai namar ba ka wanrah ïa ka jinghikai sha ki jaka ba jngai bad kular ban kyrshan na ki bor pynïaid jong ka Block.
U Additional Deputy Commissioner, u D B G Momin, MCS, u la ban jur halor ka jingdonkam jong ka pule puthi kaba pynshong nongrim ha ka jingtbit na ka bynta ki samla ba kin ïeng hi ha la ki jong ki kjat bad kyrpad ïa ki nongshah ai jinghikai ba kin nym pep ha kane ka jingai jinghikai bad bud ryntih ïa ki kyndon.
U kongsan ba dei u MDC jong ka Nogorpara, u Linekar K Sangma u la plie pyrda ïa katei ka jaka ai jinghikai da kaba ong ba ki jingai jinghikai shaphang ka digital ka long kaba donkam na ka bynta ban pyntbit ïalade ha ka jingïoh kam ïohjam bad ban pynduna ka jingleit na kawei ka jaka sha kawei pat hapdeng ki samla na ki shnong nongkyndong.
La sdang ïa katei ka prokram da ka jingdwai da u Pamong jong ka Chapahati Local Baptist Church bad la pynkut da ka jingai khublei da u VEC Secretary jong ka Chapahati.
Ïa kane ka jaka ai jinghikai, la pynkloi mynta ban sdang ban ai jinghikai kaba ryngkat ne kaba beit ïa ka thup ki samla kiba pynryngkat kyrteng, da kaba wallam ïa ka jingstad computer bad ki jingshisha kiba ïadei bad ki kam pynïoh kam ïa kiba shong ha shnong ha kane ka thaiñ.