Ka jingtynjuh ba nyngkong eh kaba ap ïa ngi ka dei ka elekshon MP shiteng samoi: Conrad

Shillong, Risaw 28 : U National President ka National People’s Party (NPP) Conrad K Sangma ha ka sngi Balang u la ong ba ka jingtynjuh kaba hakhmat eh ïa ka party mynta ka dei ka elekshon MP shiteng samoi ha kaba ki hap ban pyni ïa ka jinglah bad ka jingshaniah kaba ki ïoh na ki paidbah.
Haba kren ïa kane ha ka jingïalang pdiang burom ïa ki lai ngut ki MLA barim ka UDP kiba la wan pynïasoh noh sha ka NPP, u Conrad u la ong, “Ka kam kaba hakhmat eh ka dei elekshon MP mynta. Kane ka dei ka jingïakhun ba nyngkong ba ngi donkam ban jop,” u la ong.
Da kaba pynpaw ba man ki elekshon kim dei kiba suk, hynrei u Conrad u la ong, “Hap trei wat haba thait ruh namar donkam ban pyntikna ba kawei ka vote kam dei ban pynlehnohei.”
Nangta u la ong ruh, “Da ka jingkyrshan bad ka jingïatrei lang u Dr. DRL Nonglait un sa long u MP ba thymmai bad ngin pyntikna ïa kane.”
U Conrad u la ong ba ka NPP ka sngewkmen ban ïoh ïa u Dr. D.R.L. Nonglait kum u kyrtong jong ka party ha ka elekshon MP bad u la pynpaw ïa ka jingshaniah ba u Dr. Nonglait u dei u kyrtong uba biang ban mihkhmat ïa ki paidbah bad ïa ka Jylla ha Parliament.
Ha kajuh ka por u Conrad u la ong ruh ba ka bynta kaba ar pat kaba ki hap ban buh hakhmat ha kane ka snem ka long ka elekshon MDC ha GHADC kaba donkam ïa ka jingkyrshan lang jong baroh.
“Bad ka kam kaba khia bad kaba khraw tam ka dei ka elekshon MLA ha u 2028. Ki paidbah mynta ki la sdang ban ngeit ba ka Meghalaya ka don ïa ka bor ban ïalam nakhmat ïa ka ri kumta donkam ba baroh ki MLA jongngi ba kin trei shitom da ka mynsiem ban jop,” u la bynrap biang.
U Conrad u kyntu ïa ki nongtrei ka party ban long kiba sngewrit bad buh hakhmat ïa ka jingmyntoi jong ki paidbah. “Haba ki nongïalam ki don ka jingïapher ha ka jingmut, ki dei ban kren markhmat bad pynbeit ïa ka hapoh, ym ban pynpaw ïa ka shabar ne lyngba ki lad pathai khubor,” u la ong.
Shuh shuh u la ïathuh ba ki la don ki khep ha kaba u Bah Prestone Tynsong um lah ban pdiang ïa ka jingmut jong u, bad don ruh ki khep ha kaba u Bah Sniawbhalang Dhar um lah ban pdiang. Kumjuh, don ki khep ha kaba ma u ruh um lah ban pdiang ïa ki jingmut jong kiwei.
Da kaba ong, ba baroh ki briew ki don ka jingsngew sarong bad sngewkhraw ïalade, hynrei u la kyntu ba ki dei ban pynduna ïa kata bad ban pyrkhat shuwa ïa ka jingmyntoi jong ki paidbah.
U la kyntu ïa ki nongtrei ka party ba ki dei ban long kiba kloi ban trei ïa kano kano ka kam, wat lada ka long kaba rit, na ka bynta ka party bad ki paidbah. “U la ong ba ki nongïalam kim dei ban khmih lynti ba ki jingeh kin jah noh, namar ba ki la jied hi ban trei ïa kane ka kam bad ki dei ban long kiba kloi ban pdiang ïa ka jingkitkhlieh bad ka jingban khia jong ka kam.”
“Ngi la jied ban shakri, kumta ngim don hok ban ud ne khñium. Phi dei ban kynmaw ïa kata haba phi trei na ka bynta ka party ne haba phi don ha ka saiñ pyrthei,” u la ong.
U la ong ruh ba ka saiñ pyrthei kam dei ka kam kaba suk, namar ka don bun ki jingeh kiba ki nongïalam ki hap ban ïakynduh.