Ka Congress ka dang pynkhlaiñ ha North East, ka seng Congress kan sa ïohbiang ïa kaba kala duh

Shillong, Risaw 28: Ka Congress ka nang pynkhlain ha ka thain shatei lammihngi bad kan ioh biang ïa kawei pa kawei kaba kila duh noh, la ong u nongialam ka liang pyrshah ha Lok Sabbha u Adhir Ranjan Chowdhury hangne ha ka sngi Balang.
U Chowdhury uba la pynlong ïa ka jingialang bad ki nongialam bad ki nongtrei ka party ha Shillong, u la ong ba ka party ka la mad ïa ka jingeh namar ka jingshah thombor ha ka sain.
“Ka thain shatei lam mihngi ka dei ka thain ha kaba ngi hap ban ïaleh tyngeh ban ioh bat biang ia la ka jong kaba la duh noh.Ha Meghalaya ruh kumba long kiwei pat ki jylla, ngi la shah thong bad shah shim noh ha iwei ha ka sain pyrthei (political poaching) da ki ba don ha ka bor synshar”, u la ong.
Haba kynthoh pyrshah ïa ka BJP, u la ong, “Ngi mad jingeh namar ka jingïapher bad ka sain pyrthei kaba rit kaba la leh da ka bor synshar.Kiba bun ki seng riewlum ka thaiñ ha NE ki la kylla long ki paralok ba ïatreilang bad ka sorkar bad ki pynlut ïa ki lad ki lynti jong ki ban pyntlot ïa ka Congress ban bteng ha ka bor.”
Wat hapdeng jong kane, u Chowdhury u la ong ba ki nongtrei jong ka party ki dang ïa don beit bad ka party.
“Phi la iohi mynta ka sngi ïa ka jingshitrhem jong ki nongtrei ka party jong ngi ha ophis jong ka party.Ngi la ïakren ïa ki buit treikam jong ngi.Kumba long ha kiwei ki bynta jong ka ri, ka Congress hangne ruh ka nang pynkhlain ïalade”, u la ong.
U la pynskhem ba ka thain shatei lammihngi kan wanphai biang sha ka kynhun jong ka Congress.
“Kawei pa kawei ka inshi jong ka thain NE kaba ngi la duh yn pynioh biang da kano kano ka lad, mynta ka sngi ne lashai, ka NE kan wan biang ha seng Congress”, u la bynrap.