Shillong, Risaw 28 : Ka National People’s Party (NPP) ha ka sngi Balang ka la pdiang burom ïa ki lai ngut ki MLA jong ka UDP kiba la wan ban pynïasoh pura sha ka party NPP ryngkat ki nongïalam bad ki nongkyrshan ha ka rukom kaba shongkun bha.
Kine ki lai ngut ki MLA kiba wan pynïasoh pura sha ka NPP ki kynthup ïa u Bah Paul Lyngdoh, MLA Shillong West bad u MLA ka Mawkyrwat Bah Renikton Lyngdoh Tongkhar bad u Bah Nujorki Sungoh ba dei MLA ka Mookaiaw. Hynrei ha kane ka sngi u Bah Nujorki um shym la donlang namar u don shabar jylla bad ha ka jaka jong u la wan ban mihkhmat da u President bad ki nongïalam ka party na Mookaïaw.
Ïa kine ki MLA ba thymmai la pdiang burom da u National President ka party ba dei ruh u Myntri Rangbah ka Jylla Conrad K Sangma, nangta u State President ka NPP Bah Prestone Tynsong bad National Vice President Bah Sniawbhalang Dhar kiba dei ruh ki Symbud Myntri Rangbah ka Jylla.
Kiwei pat kiba donlang ha kane ka jingïalang ki kynthup naduh ki Myntri Sorkar bad MLA na ka party, MDC bad ki nongïalam party kynthup ïa u kyrtong MP ka party ha kane ka elekshon shiteng samoi Dr.DRL Nonglait.
Ha kane ka sngi la ïoh ïa ka jingkren maitphang na u Bah Hamletson Dohling, Working President ka party uba la ong ba ka jingwan jong kine ki lai ngut sha ka NPP ka pyni ba ki ïohi ba ka party ka don ïa ka rukom treikam kaba janai bad kaba ai jingkyrmen ïa ki paidbah.
Na ka liang u General Secretary ka party, Dr. Donkupar War u la pyntip ba kum ka party ka sngewkmen ba ki ïoh ban pdiang burom ïa u Bah Paul Lyngdoh uba la jop haduh 4 sien, nangta u Bah Renikton bad Bah Nujorki kiba la jop mar arsien kum ki nongmihkhmat paidbah.
