Mih ki kynrum kynram ka SIR ka dei namar ka sorkar pdeng kam sngap ïa ka Ïingbishar: Dr.Kharlukhi

Shillong, Risaw 26: U MP barim ka Rajya Sabha na Meghalaya uba dei ruh u nongïalam barim ka National Peoples Party (NPP) u Dr, W R Kharlukhi, u la ïathuh ba dei tang ha u snem 2023, bad ha shwa kane kam shym don kano kano ka aiñ kaba pynïaid halor ka jingthung ïa Chief Election Commissioner bad tat haduh katei ka snem ym don aiñ naba ka kam Election Commissioner ka synriem kum ka riti synshar jong ka ri.
“Na ka jingbym don ka aiñ, ïa u Chief Election Commisioner bad ki election commissioner la thung da ka President ka ri India hapoh ka jingai jingmut jong u Myntri Rangbah duh ka ri bad ka kynhun ki Myntri ka sorkar pdeng bad dei ha u snem 2023 ba kane ka kam ka la poi sha ka Ïingbishar Supreme Court bad kaba nga sngew manga ka long ba lada kane ka sorkar kaba mynta lada ka sngap ïa ka jingbishar ba la pynmih da ka Iingbishar kan ym mad ïa kane ka jingeh jong ka SIR,” ong u Dr Kharlukhi.
U la ong ba ka jingbishar ba la pynmih da ka Ïingkashari ha ka 3 tarik u Lber 2023, ka long ban jied ïa u CEC jong ka ri India dei ban donlang da u Myntri Rangbah duh ka ri, u nongïalam ka Liang Pyrshah bad Chief Justice of India, hynrei kaei kaba jia ka long ba ha u Nohprah 2023 ka Parliament ka la thaw ka aiñ ba ka jingthung ïa u CEC kan don da ka Committee kaba kynthup ïa u Myntri Rangbah duh ka ri, u Nongïalam ka Liang Pyrshah bad ki Myntri ka sorkar pdeng bad dei halor kane ba la leh da ka sorkar ba ka khlem pynïaid katkum ki jingai jingbishar ka Ïingkashari ba sa mih ki jingkulmar halor ka Special Intensive Revision kumba la jia ha West Bengal bad kiwei ki jylla.