Ym shuh kum ha u snem 2024 : Mynta ka seng VPP ka la nang hiar nang hiar na manla ki jaka bad ki shnong: Pala

Shillong, Risaw 26: U President ka Meghalaya Pradesh Congress Committee (MPCC) u Bah Vincent H Pala ha ka sngi Nyngkong u la ong ba ka jingkren bad ka lyer jong ka VPP jong u snem 2024 ka la jah noh bad ka jingbuh ki nongkyrshan jong ka, ka la “hiar jur bha” ha kylleng ka Khasi bad Jaiñtia Hills.
U Bah Pala uba dang pynkhreh ïalade ïa ka elekshon shiteng samoi jong ka Shillong Lok Sabha hadien ba u la shah rem noh ha u snem 2024 hadien ba u la long kumba 15 snem kum u MP, u la ong ba ka jingïakhun kan long hapdeng ki lai dong.
Haba jubab ïa ka jingkylli hato ka VPP ka dang bat ïa ka jingkhih ka lyer jong ka ha u snem 2024, u Pala u la ong, “Ha lade, nga sngew ba ka jingkhih ha u snem 2024 ka pher na kaba ka long mynta. Ha kato ka por ka jingkhih jong ka social media ka la don hangto.”
U la ong ba u la leit jngoh ïa ki katto katne ki jaka ba skhem jong ka VPP bad lap ïa ka jingduhnong jong ka jingkyrshan.
“Ka VPP ka la ïoh ïa ka jingkyrshan kaba heh tam na Mylliem, hynrei nga la leit sha Mylliem ha kane ka kynti bad nga ïohi ba ka jingkyrshan ka la hiar bha. Ki la don ka jingkyrshan kaba khraw na Sohra bad ki thaiñ khappud kum ka Pynursla, hynrei mynta ka la hiar bha. Ha Jaiñtia Hills ka VPP ka la hiar bha,” u la ong.
“Ngim ïohi ba ka umsaw jong ka VPP kan kiew, hynrei ka nang hiar man la ka sngi,” la kynnoh u Bah Pala.
U nongïalam ka seng Congress u la ong ba ki nongthep vote kin shim ïa ka jingkhot kaba khatduh tang hadien ba la pynbna ïa ka tarik elekshon bad ka jingïathep kyrteng.
“Kane ka elekshon kan long ka jingïakhun kaba lai dong hapdeng ka Congress, ka NPP bad ka VPP, hynrei ki briew kin nym rai tad haduh bad lymda la pynbna ïa ka elekshon bad uwei pa uwei u kyrtong un thep kyrteng”, u la ong.
Haba pynpaw ïa ka jingsynshar jong ka VPP ha ka district council East Khasi Hills, u Bah Pala u la ong, “Bun ki khyrdop ki wan khlem ka jingshai bad khlem ka jingkitkhlieh bad bun ki Syiem ki shah pynhap khlem kano kano ka daw kaba biang. Ki la leit wat sha ka ïingbishar bad ki la jop ïa ka mukotduma.”
U la bynrap, “Kane ka pyni ba kim lah wat ban synshar ha district council, kumno phin khmih lynti ba kin synshar ha Delhi kumjuh ha Jylla.”
“Ki paidbah ka Meghalaya kim dei kiba biej, phi lah ban biej ïa ki shisien ne arsien hynrei ym lai sien”, la ong u Bah Pala.