Lai snem khlem pat lah ban pyndep ïa ka madan phlang plastic ha Riangdo sah umdum ki paidbah

Nongstoiñ, Risaw 25: Ki paidbah ka thaiñ Mawshynrut khamtam eh ki samla kiba thrang dik dik ha ki kam ïalehkai, ki la pynpaw ïa ka jinglyngngoh halor ka jingsuki palat ka jingpyntrei ïa ka madan phlang plastic kaba don ha Riangdo West Khasi Hills.
Kumban shu pynkynmaw ïa kane ka madan la buh ïa u mawnongrim ban shna ïa kane ka madan phlang plastic ha ka 2 tarik u Rymphang 2024, da u myntri ka tnad ïalehkai kata u bah Shakliar Warjri ha jingïadonlang u local MLA Bah Methodius Dkhar.
Lah ban pynkynmaw ruh ba na ka liang u myntri Rangbah ka jylla u Conrad K Sangma u la kular ba yn pyndep ïa ka madan hapoh ka 18 bnai. Hynrei mynta la jan dap lai snem duna khlem pat lah ban pyndep.
Halor kane na ka liang ka seng HYC Riangdo Unit ha ka sngi saitjaiñ jong ka taiew ba la lah, ka la hiar ban jurip ïa ka jinglong jingman jong kane ka madan kaba la pynbna ban shna artificial turf lane phlang plastic ha madan Riangdo.
Ka seng ha ka jingïalam jong u samla Banteilang Hoojon, hadien ka jingpeit bniah, ka la lap ba kane ka jingpyntrei ïa kane ka madan ka long kaba suki shaba palat bad haduh mynta mynne ruh ka jingtrei ka dang long tang kumba 50% ei ei.
Ka jingsuki ban pyntrei ïa kane ka madan, ka la ktah shikatdei eh ïa ki khun samla kiba don ka sap ban pyntbit ïa ka kam ïalehkai jong ki khun samla kiba dang khie dang san khamtam eh.
Ha ki snem bym pat pyntrei ïa kane ka madan phlang plastic, la ju pynlong khah khah ïa ki jingïalehkai ha kiba bun ki tournament ba la khot pynlong da ki riew shimet, ki kynhun sengbhalang bapher bapher kum ka Mawshynrut Sport Association naduh ka first division, second division, third division kumjuh ka super division.
Man ka por ki paitbah kiba don ha kane ka thaiñ kiba ieid ïa ka kam phutbol, ki wan sakhi ban wan peit ban pynshngaiñ lem ha la ki jong ki jong ki team. Kane ka madan ka long hapdeng bha ha kaba baroh ki shnong kiba hapoh ka jingpeit ka Mawshynrut C&RD Block ka don ruh hajan ka ïew Riangdo ka don ruh hajan ki ophis sorkar bapher bapher.
Kumta, ka jingpynslem ban pyntrei ïa kane ka madan, ka la long ka jingduhnong kaba khraw eh ïa ka dong ka thaiñ khamtam eh ïa ki khun samla kiba dang khie dang san bad kiba donkam ban kilan met ban ban pyni ïa ki sap ïalehkai ka jong ki.
Na ka liang jong ngi ka seng ka da kyntu jur ïa u Contractor u ba dei ban pyntrei ïa kane ka madan, nangta ïa u Local MLA u ba long u myntri ka sorkar, ba kin sngewbha ban ïaleh ban pyndep noh kham kloi ïa kane ka madan.
Ka seng ka da kyrmen ha u snem ban wan yn ïohi ba kane ka madan kan dep noh, khnang ba kin ïoh ban ïalehkai noh ha kane ka madan. Lada kim lah ban pyndep na ka liang jong ka seng kam banse hap ban shim da kiwei pat ki sien jam.