Shillong, Risaw 23 : Ka Dr. Homiwell Memorial Secondary School, Mawklot, ha ka sngi Balang, ka 21 tarik u Risaw, ka la sdang ïa ka jingrakhe ïa ka Jubili Rupa (Silver Jubilee) jong ka skul lyngba ka jingpynher ïa ka lama da u nong seng ïa ka skul, u Rev. EH Kharkongor.
Haba pynher ïa ka lama, u Rev. Kharkongor u la wer ïa baroh kiba don ha ka jingïalang ban kular ban kyntiew ïa ka nam jong ka skul bad ban pynïar ïa ki jingshakri jong ka ha ka liang ka pule puthi sha ka imlang sahlang.
Haba phai dien sha ka jingïaid lynti jong ka skul kaba la kynjoh sha ka 25 snem, ka Headmistress, ka Kong Renuka Kharkongor, ka la pynkynmaw ba la plie ïa ka skul ha u snem 2001 da u MLA ba la khlad noh, u Rain Augustine Lyngdoh, uba ha katei ka por u bat ïa ka kam Myntri ba khmih ïa ka pule puthi ha ka Jylla.
La ïathuh ba naduh kaba sdang, ka skul ka don tang 42 ngut ki khynnah bad ar ngut ki nonghikai ha ki klas KG-1 bad KG-2. Hynrei mynta, ka jingbun ki khynnah pule ka la kiew bad ka ju long hapdeng 260 haduh 300 ngut. Ka skul ka la pynpaw ruh ïa ka jingjop kaba 100 percent ha ki katto-katne tylli ki eksamin SSLC ba la pynlong dang shen da ka State Board.
U Rangbah Shnong bad Chairman jong ka skul, u Bah Mawkordor Nongneng, haba ai khublei ïa ki paidbah bad kiba la shah khot sngewbha bad baroh kiba la wan sha ka jingïalang, u la kyntu ïa ki kmie ki kpa bad ki nongkyrshan ba kin bteng ban ai ka jingïatreilang bad jingïarap ïa ka skul.
U Lecturer ha ka Commerce uba deiruh u wei na ki samla pule barim jong ka skul, u Ricky Nelson Nongdhar, u la ïathuh ïa ka jingïaid lynti jong u ha kane ka skul, naduh Nursery haduh Matrik. U la pynkynmaw ïa ka jingieit bad jingsumar jong ka Madam Kharkongor, kaba la khlad noh, kaba long ka Head-teacher kaba nyngkong jong ka skul, kaba u la burom bad sheptieng namar ka jinglong nonghikai jong ka.
U la kyntu ïa ki khynnah pule ban pyndonkam hok ïa ki snem pule jong ki, ban trei shitom, ban burom ïa ki nonghikai bad ban long ka jingkyrkhu ïa ka imlang sahlang.
U Rev. Kharkongor u la ïathuh ba u la sah ha Mawklot la phra snem haba u dang long Principal jong ka John Roberts Theological Seminary. Haba trei ban kyntiew ïa katei ka jaka pule, u la sngew ruh ïa ka jingkitkhlieh ban noh synñiang sha ka roi ka par jong ka shnong.
Da ka jingïarap jong ka lok jong u kaba la khlad noh bad ka jingïatreilang bad ki nongïalam shnong bad ki longkmie, ki la seng ïa ka Dr Homiwell Memorial Secondary School.
U la ong ba ka jingjied ïa ka kyrteng jong ka skul ka long kaba la pyrkhat sani bha, khnang ban burom, pynpaw bad kyntiew ïa ka nam jong u Dr. Homiwell Lyngdoh, uba dei u briew uba pawnam bad uba dei na ka shnong Mawklot.
U la kyntu ïa ki khynnah pule ban tip shaphang une u rangbah bad ban shim ïa ka jingim jong u kum ka nuksa ban tei ïa la ka jong ka jingim.
Haba kren halor ka phang bad ka motto jong ka skul, “KNOWLEDGE IS POWER” (Ka Jingtip ka dei ka Bor), u Rev. Kharkongor u la pynkynmaw ïa ki nonghikai bad ki khynnah pule ba ka jinglum bad ïasam ïa ki jingtip ha skul ka dei ban lam sha ka jinglong kiba stad bad kiba don ka jingstad ban pyndonkam hok ïa kata ka jingtip.
U la maham bad kyntu ruh ba ïa ka bor kaba mih na ka jingtip ym dei ban pyndonkam ban ban beiñ ne ban synshar jubor ïa kiwei, hynrei ban kyntiew ïa kiwei bad ban leh ïa kaba bha.
Ka kongsan ka jingïalang, ka MDC barim, ka Kong Teilinia Thangkhiew, haba ai nuksa ïa ka Mother Teresa, ka la kyntu ïa ki khynnah pule ban long kiba sbun mynsiem, ban ieit para briew bad ban pynmih ïa ki kam babha kiba lah ban ktah bha ïa ka imlang sahlang.
U kongsan jong ka jingïalang, u Adviser jong u Myntri Rangbah ka Meghalaya bad MLA barim, u Bah Hamletson Dohling, u la ai jingïaroh ïa ka skul, ki nong seng ïa ka, ki nongpynïaid bad baroh kiba la wan sha katei ka jingïalang. U la kular ruh ban wad lad ban leh ïa kaba donkam na ka bynta ka skul, kum shi bynta jong ka jingïarap kaba u la ju ai ïa ka.
U la ban jur ïa ka jingdonkam ban pynmih bad pynsan ïa ki nongïalam tynrai jong ka ri, kum u Dr. Homiwell, bad u la ong ba ki jaka pule bad ki nongïalam shnong ki dei ban ïarap ïa ki khynnah pule bad ki samla mynta ban tip shaphang ki nongïalam barim jong ngi, ka jingaiti lut jong ki, ka jinglen lade bad ka jingshakri jong ki ïa ki paidbah bad ïa ka ri.
Ha kane ka jingïalang, la donlang ruh uwei u khun ksiew bad uwei u khun ksiew ba la lai pateng jong u Dr. Homiwell, ryngkat bad ar ngut ki khun kynthei jong u Elder Maurice G. Lyngdoh uba la khlad noh, uba la don bynta ban pynïasoh ïa ka skul bad kane ka longïing kaba pawnam.
Kiwei pat kiba la donlang ki long ki dkhot nong seng ïa ka skul, ki nonghikai barim, ki khynnah pule barim, ki nongkyrshan bad ki nongshong shnong jong ka Mawklot.
Ki khynnah pule ki la pyni ïa ki jingrwai kiba itynnad bad ki jingshad kiba itynnad bha, kiba la pynphuh pynphieng ïa ka jingïalang.
La buh ban pynlong ïa ka jingïalang pynkut jong ka jingrakhe Silver Jubilee ha ka 29 tarik u Nohprah, 2026.
Kane ka long katkum ka kyrwoh ba la phah da ka Headmistress jong ka School, Kong Renuka Kharkongor.
