Ba thmu ban pyndonkam noh da u Smart Metre ban siew bai bording
Yn ïakynduh ka HAMN ïa ki Sahep ka MePDCL
Mawkyrwat, Risaw 22: Ka Hynñiewtrep Achik National Movement (HANM) jong ka South West Khasi Hills District, mynta ka sngi ka la leit ban ïakynduh ïa ki ophisar bad nongtrei jong ka MePDCL jong ka Mawkyrwat Division, ban pynsngew ïa ka jingsngewkhia halor lai tylli ki mat kiba kongsan.
Ki mat ba ka HANM ka la leit ban ïa kynduh ka long ban ban jingshai namar ba ka la don ka jingthmu ban pyndonkam da ki Smart Meter na ka bynta ka jingsiew ïa ka bording, nangta, ka jingthmu ban pynkynriah kam ïa ki nongtrei na Mawkyrwat Division sha Mawsynram, bad ka jingbym don u Sub-Divisional Officer (SDO) ha ka ophis jong ka MePDCL, Mawkyrwat Division.
Haba kren sha ki lad pathai khubor, u Bah Lambokstar Marweiñ, President ka HANM, South West Khasi Hills District, la pynpaw ruh ïa ka jingsngewkhia halor ka jingthmu ban pyndonkam da ki Smart Meter na ka bynta ka jingsiew ïa ka bording, namar kane ka lah ban ktah ïa ki paidbah kiba duna ka ïoh ka kot. Kumta, ka seng ka kyntu ïa ki bor ba dei khmih ba kin shimkhia ïa kane ka bynta bad ban pyrkhat bniah ïa ka jingeh kaba lah ban mih na kane ka jingpynkylla.
Haba kren halor ka jingpynkynriah kam pat, u la ong ba ka la don ka jingthmu ban shu ai contract bad uta u nongshim un sa thung ïa ki briew ban trei ha kane ka MePDCL Mawkyrwat Division. Kumta kum ka seng ka pyrshah jur ïa kane bad u la byhrapt da kaba ong ba lada don kino kino ki kam ba lait hapoh kane ka Division, dei ban pynbna lyngba ki advertisement, khnang ba ki samla na ka dong ka thaiñ Mawkyrwat kin ïoh ïa ka lad ban aplai bad ïakhun na ka bynta kino kino ki kam kiba lait, khnang ba kan long ka jingmyntoi ïa ki nongaplai.
Shuh shuh, u Bah Lambokstar Marweiñ u la ong ba la bun snem mynta ym pat don u SDO hapoh kane ka ophis jong ka MePDCL, Mawkyrwat Division. Kumta, halor kane, u la kyrpad ïa u Bah Metbah Lyngdoh, Myntri ka Sorkar Jylla uba khmih ïa ka tnad Bording, ba un shimkhia mardor ban pynbeit ïa kane ka jingeh, khnang ban lah ban pynthikna ba ki paidbah kin ïoh ïa ki jingshakri kiba paka bad ba ki kam jong ka tnad Bording ha ka thaiñ bad ba kin ïaid beit ïaid ryntih.