Kurup ka tnat khlaw ïa ki jaka ot dieng, ki dieng bad ki mashin be-aiñ ha West Garo Hills

Shillong, Risaw 22: Ka tnad khlaw ka la leit khynra ïa ka jaka ot dieng beaiñ ha West Garo Hills, ha kaba ka la ïoh kurup ïa ki dieng bad ki mashin ot dieng ha katei ka jingkhynra kaba don hajan Bhaitbari bad kane ka la jia ha ka 21 tarik Risaw.
Ha katei ka jingleit khynra, ïa kane ka kynhun, la ïalamkhmat da u Range Officer ka Hollaidanga Range, hapoh ka jingpynïaid jong ka Divisional Forest Officer, West bad South-West Garo Hills Territorial Division, kaba la pynlong ïa katei ka jingkhynra ha Belbari bad Gasbari Sorokpara kaba bud da ki kaiphod jong ka jingpynïaid beaiñ ïa ka karkhana ot dieng.
Ha Belbari, ki heh sorkar ki la ïoh 40 tylli ki dieng Sal hadien ba ka kynhun forest ka la dep pynpra noh ïa kine ki mashin hashwa ban poi ma ki. Ha Gasbari Sorokpara, ïa ka mashin ot dieng beaiñ la dep pynpra, kynthup ïa ka engine, ki chain rynjup bad kiwei kiwei kiba ïadei bad kane ka jingjia.
Katba ïa ki dieng bad ki mashin, la dep rah sha Hollaidanga Range Headquarters na ka bynta ka jingshngaiñ.
U Divisional Forest Officer, u Rupanker K. Marak, IFS, u la ong ba ka jingkhynra bad ka jingbthah kaba pyrkhing halor ka kam khaïi beaiñ kan bteng ban pynpra lyngkhot lyngkhai ïa ki kynhun khaïi dieng beaiñ ha kylleng ka West Garo Hills.