Shillong, Risaw 22: Hadien ka jingïai bteng ba shah kawang petrol bom ha nongbah Shillong wat hapdeng ka ka jingpyrkhing kaba jur, ka tnad pulit ka pan shuh shuh ïa ki bor pahara na ka sorkar kmie.
Kum ban shu kdew ba ha ka step jong ka 22 tarik u Risaw kala don jingjia kawang petrol bomb hapoh ka ophis ka Enforcement Directorate ha Shyiap hynne ka step sngi Palei, kaba dei ka sien kaba saw ba jia kum kawei ka jingjia ha Shillong ha kine ki 48 kynta bala leit noh.
Kat kum ki Pulit, ki runar kila kawang petrol bomb ha ka Ophis ka ED bad hap hapoh ki mawkyndon ban rung shapoh ka Ophis.Ym shym la don mano mano ruh ba mynsaw halor kane ka jingjia.
Ka Shillong kala sakhi ïa ki bun tylli ki jingjia kawang petrol bomb naduh ka sngi Ba-ar, kaba kynthup ha Kench’s Trace, Keating Road bad Laitumkhrah.
Haba kren sha ki lad pathai khubor, u Superintendent of Police (City) ka East Khasi Hills u Bah Dangsan Khyriem ula kubur ba kane ka jingthombor kala jia wat hapdeng ki jingtalasi bad pahara kaba la pynkhlain.
“Watla ngi la buh ïa ki jaka talasi bad ka jingiaid pahara man ka sngi ha baroh ki jaka kiba hap hapoh ka sor Shillong bad ha khapsor, ki dang don hi ki jingjia kawang petrol bomb hynnin ka sngi ha Langkyrding hynrei ym shym la don kano kano ka jingjulor” ula ong.
Haba pynpaw ba yn nang pynkhlain shuh shuh ia ka jingiaid pahara, ula ong “Ngin dang pynbteng ïa ka jingbuh ïa ki jaka talasi bad ngi la pan ruh ïa ki bor pahara ka Sorkar kmie naduh mynta ka sngi bad ngi lah ban ioh ïa ki ha kine ki khyndiat sngi ban wan”.
Halor ka jingiaid ka jingtohkit, u Bah Dangsan ula ong “Ngi dang thwet ïa ki runar kiba donkti ha lyntdet kine ki jingkawang patrol bomb”.
