Mairang, Risaw 22: Ka surok na Kynshibangla kaba ïaid lyngba ïa ki bun tylli ki shnong haduh Parïong ka dei ka surok kaba don kam bha namar ba ki shnong kiba don ha shi lynter katei ka surok ki dei kiba la bun briew bha.
Wat la katei ka surok ka dei kaba la shna na duh ki snem ba mynshuwa hynrei ka bynta ba hakhmat kaba don kumba lai kilomitar tam ka la sdang ban jot bad ka la don kam eh ban moramot bad pynbha na ka bynta ban pynsuk ïa ka leit ka wan jong ki paitbah hynrei ka sorkar ka shem jingeh pat ban mang pisa na ka bynta ban pynbha bad moramot ïa katei ka bynta jong ka surok namar ka dang don hapdeng jong ka kynrum kynram bad ka jingbym hun jong ki trai khyndew ba katei ka surok ka ïaid lyngba.
Dang ha ka taïew ba la dep na ka liang u Conrad Kongal Sangma Myntri Rangbah ka jylla haba ai jingkren ha Mawkyllei haba u wan ban long u kongsan ha ka jingrahe jong ka Mawkyllei College ïa ka jingdap khatsan snem u la ong ba katei ka surok naduh ka lad ban leit sha Markham bad Tiehnongbah ka la idon kam haduh katta katta ban pynbha bad pynheh shuh shuh ïa ka bad ka sorkar ka la kwah eh ban mang pisa hynrei kam don lad satia namar katei ka bynta kaba la don kam ban pynheh bad pynbha shuh shuh ka don hapdeng jong ka jingïakajia bad ka kam ka dang sah ha ka Ïngbishar kumta ym lah ban leh ei ei .
Na ka liang u Myntri Rangbah u la ong ruh ba lada ka sorkar ka mang pisa na ka bynta kino kino ki kam pynroi kiba dei na ka bynta ki paitbah nongshong shnong la ka dei ïa ki surok, ki jingtei, ki madan ïalehkai ne kino kino ki bynta lada don ki kynrum kynram bad ka jingbym ïaid beit ka shem jingeh haduh katta katta.
Wat la katta ruh u Myntri Rangbah u la ong ba na ka liang ka sorkar kan pyrshang katba lah ban thaw ki lad ki lynti bad ban kyrpad ïa ka Ïngbishar ba kan pynkloi katba lah ban pynbeit ïa ki kynrum kynram khnang ba ka sorkar kan mang pisa na ka bynta ban pynbha bad pynheh ïa katei ka surok.
Shuh shuh u la ong ba lada la pynbha bad kham pynheh ïa katei ka surok kan long ka jingmyntoi kaba khraw ïa ki paitbah jong ki shnong kiba don ha katei ka thaiñ bad kan kyntiew ruh ïa ka ïoh ka kot namar ki nongshangkai suwari na kylleng ki jaka ki kwah ban leit shangkai sha Markham, bad kiwei kiwei ki jaka kiba itynnad kiba don ha katei ka thaiñ.
Khatduh eh ua la kyntu ïa ki paitbah nongshong shnong bad ki trai khyndew kiba katei ka surok ka dei ïaid ba ki dei ban ïapynbeit da ka jingïasngewthuh jingmut bad ka jingïahun lang namar katei ka surok ka dei na ka bynta ka jingmyntoi jong baroh lang ym tang jong uwei ne arngut bad lada kam don shuh kino kino ki jyrwit jyrwat ka sorkar ka long kaba la kloi eh ban mang pisa na ka bynta ban pynbha bad kham pynheh ïa katei ka surok.
