Hadien ka jingïohi ïa ki jingduna ki jingtei, rai ka sorkar ban kyntiew kyrdan noh ïa ki block ophis, ong u Conrad

Shillong, Risaw 22: U Myntri Rangbah ka Jylla u Conrad K Sangma ha ka sngi Palei ula leit ban plie paidbah ïa ka Block Integrated Development Complex (BIDC) ba T. 3 klur ha Gambegre Community and Rural Development (C&RD) Block ha West Garo Hills, bad ha kane ka jingplie u la pynpaw ïa ka jingpyrshang jong ka Sorkar ban pynbha ïa ki jingtei ha ki jaka nongkyndong bad ban wanrah ïa ka jingshakri ka Sorkar kaba shajan jong u paidbah ka jylla ba kane ka thaiñ.
Ha kane ka sngi Ïa u Myntri Rangbah la synran da ka kurim bad MLA ka Gambegre ka Dr Mehtab Chandee A Sangma bad Aking Nokma ka Gambegre Chekme Ch Marak, ba la noh synniang ïa ka jaka na ka bynta ka complex. U Conrad ula pynkup burom ruh ïa ka Marak halor ka synniang bad ka la ïashimbynta lang ha ka jingot ïa u ribbon ha kane ka sngi.
Ha kane ka jingleit ïuhkjat ha ka sngi Palei, u Myntri Rangbah ula plie ruh ïa ka Digital Library ba dang shu shna thymmai bad ka ATM ka State Bank of India (SBI) hapoh kane hi ka complex.
Ha kaba ïadei bad kane haba ai jingkren, u Myntri Rangbah ula ong ba ka Sorkar ka la rai ban kyntiew kyrdan ïa ki Block Office hadien ka jingïohi ïa ka jingduna ki jingtei ha ka jingleit jurip jong u ha kylleng ki jaka ka Jylla.
U la ong, “Ha ka jingleit ïuhkjat jong nga ha kylleng ki jaka jong ka Jylla, Nga la sakhi ïa ki jingtei kiba la rim ha ki Block Office, kaba lam sha kane ka jingpyrkhat kaba thymmai. Ka jingthmu ka long ban ai ïa baroh ki jingshakri ïa u paidbah-kynthup ka jingai ïa ki caste certificate bad EPIC card-na kawei ka jaka lyngba ka technology.”
Ha kane ka sngi u Myntri Rangbah ula pynbna ruh ba shen yn sa buh ïa ka CM Connect Centre ha Gambegre complex ha kaba kane ka centre kan ïarap ïa ki nongshong shnong ba kin ïoh ïa ki welfare scheme bad ba kin ïoh ban pyntip ïa ki jingeh da ka jingthoh.
Ka Gambegre complex ka dei shibynta jong ka prokram ba la sdang pyntreikam ha u snem 2022-23 ban kyntiew kyrdan ïa baroh 56 tylli ki C&RD Block ha Meghalaya.
La ong ba na ki 40 tylli ki Integrated complex ba la mang ha u 2022-23, haduh 34 tylli lah dep ban pyntrei pura katba hynriew tylli ki dei kiba la jan dep artad. Ka ri-lum Garo ka don haduh 17 tylli napdeng ki 40 tylli ki complex.
Ha kawei pat ka liang, haba ai jingkren ha kane ka sngi, ka MLA ka Gambegre ka Dr Mehtab Chandee A Sangma ka la kren halor ka jingkongsan ki Ophis jong ki Block ban ai ïa ka jingshakri jong ka Sorkar sha ki longïing ha ki thaiñ nongkyndong.
Ka la ong, “Ki block office ki dei ki ophis ba nyngkong eh ban ïakynduh hapdeng ki longïing ha nongkyndong bad ka Sorkar,” bad bynrap, “U Myntri Rangbah ula sbun shisha ban pyntrei ïa kane ka project ba kongsan ha ka ban kyntiew kyrdan ïa man ki ophis jong ki block ha kylleng ka jylla Meghalaya.”