Jowai, Risaw 22 : Ka Khasi Students’ Union (KSU) West Jaiñtia Hills District Unit kala pynkup burom ïa ki lai ngut ki samla ka Ri-Lum Jaiñtia kiba wanrah nam ïaka Ri bad ïa ka Jaidbynriew haka Lympung 2nd Mr & Miss Asia Bodybuilding and Fitness Championship kaba long hapoh Nongbah Shillong myn haka 10 Risaw 2026.
Kine ki samla kiba la shah pynkup burom ki long u samla Mayalang Pakem bala khur ïaka nam jop haka kyrdan ba Nyngkong jong ka Senior Men’s Bodybuilding (55kg), u Samla William Rymbai bala khur ïaka nam jop haka Kyrdan ba Nyngkong jong ka Junior Men’s Physique bad ïa u Samla Lucky Man Kynjing bala ïoh khur ïaka nam jop haka Kyrdan ba-lai jong ka Senior Men’s Physique (Below 5.5).
Ïa ka jingïalang pynkupburom ba lyngkot la pynïaid da u samla Chanbor War uba dei u Vice President KSU West Jaiñtia Hills District Unit, U President Samla Laitphar Syngkrem, General Secretary Samla Lenningrad Tariang haba ai jingkren kila ai mynsiem bad ïaroh ïaka jingtrei shitom kine ki samla kiba lah ïakhun tyngeh ban ïoh rah ïaka jingjop wat hapdeng ki jingeh ba ki ïa kynduh haka por ba ki pynkhreh ïa kane ka jingïakhun.
U samla Mayalang Pakem uwei na ki nongjop haba ai jingkren u la ai ka jong ïaroh ïaka KSU ba ka lah wan sha khmat ban ai mynsiem ïa ki ba kin dang lah ban ïaid sha khmat ban nang lah ban jop haki rynsan bapher bapher, une u samla u kyrpad ïaka seng ba kan pynsngew sha ka sorkar ban sngap bad peit ïaka jing donkam ki nongïalehkai Sports la kadei ha kino kino ki kyrdan jing ïakhun.
Ka seng ha ibor iba rit ka la kular ban don ha syndah bad ki samla kiba don jingmut shisha ban pyndep ïa ka jingthmu kaba bha ka jong ki wat la hapdeng ki jingtynjuh kiba ki hap ban ïa kynduh bad ruh kala ai mynsiem ïaki ba kin dang ïai trei shitom haki sngi ban wan.
