Na ka kam u Lum Shyllong kwah ka sorkar ban phiah ïa ki nongshong shnong jong ka sor Shillong

Shillong, Risaw 21: U Chairman jong ka Green Tech Meghalaya u Bah H Bansiewdor Nonglang u la kynnoh ba ka sorkar lyngba ka jingïalang kaba la khot ha ka janmiet jong ka sngi Palei ka dei tang ban phiah ïa ki nongshong shnong halor ka phang jong ka Project Ropeway ha u Lum Shyllong.
Ïa kane u la ong haba kren sha ki lad pathai khubor ha ka sngi Balang ha ryngkat ka jingdonlang ki dkhot jong ka JAC bad ban ïathuh ba ka jingthaw ïa ka JAC ka dei na ka bynta ki nongshong shnong bad ki shnong jong baroh ka Sor Shillong bad ka phang ba ka sorkar ka khot sha ka jingïalang ne jingïakren ban ïatai ïa u Lum Shyllong ha ka sngi Palei ka sorkar ka mut ban leh da ka divide and rule policy ban phiah ïa ki nongshong shnong.
“Ngin ym lah ban pdiang da lei lei ruh ym bakren tang da ka ktien, hynrei ngi don ki sakhi kiba biang lyngba ki kot ki sla bad ka sorkar ha ka number kaba 16 bad 17 ka la ong ba kino kino kiba leit sha katei ka jingïalang kin dei tang kito kiba sah ha syndah u Lum Shyllong wat ïa ka shnong Lawsohtun kaba don ha syndah u Lum lah shah kyntait ban shah khot sha ka jingïalang,” ong u Bah Nonglang.
U la ong ba hangne la sngewthuh ba u Lum Shyllong um ai umdih tang ïa ki nong Laban hynrei ïa ki phew tylli ki shnong hapoh ka sor Shillong bad kane kadei ka mat jong ka ri bad ka jaitbynriew. “Ka dam Mawphlang, ka Umiam bad ka Wah Umngot dei ka um kaba wan lyngba ka tyllong um u Lum Shyllong bad lada kwah ban sei ïa ki kot ki sla kiba shai, ki kam wadbniah ngi long kiba kloi bad tang kawei ngi kwah ban ong ba kan ym don nongrim ba phin khot tang katto katne ban rai ïa ka lawei jong ka ri bad ka jaitbynriew. Ngi kyntu ïa ka sorkar ban pynbeit da kawei ka tarik ïa kane ka jingïalang bad dei ban khot ïa baroh ki nongshong shnong kiba bam umdih na u Lum bad imja kpoh na u bad ban pynlong ha Polo bad ngin pynthikna ba 10 lak ngut ki briew kin poi, ngin sa ïarai la ngin dih um ne ngin shong Ropeway,” u la bynrap.
U la kynnoh ba ha manla ki jingïakhih ka sorkar ka pyrshang beit ban phiah ïa ki nongshong shnong. “Ha ka sngi Palei janmiet sngewbha wat ym shim kano kano ka rai namar lada mih ka kynrum kynram kaba jur ha Sor Shillong ka tnat Tourism kan dei ban shim ka jingkitkhlieh,” u la ong.
“Ki jingthoh jingtar ki don bad ngi hynrei pyneh ba la ioh jingbit na baroh, hato dei kine kiba ai NOC ban rai ban ym dih um shuh sha Shillong, kane ka kam kadei kaba ngi la ong em tee m. Ngi kloi ban shong byndi na ka bynta u Lum Shyllong bad ngi kloi ym salia da ka jingkmen kumta wat pyrshang ban pynbor, katta nangpynslem kata u paidbah un nangsat,” u la bynrap.
U la ïathuh ba ka High Court Meghalaya Shillong Bench ha u snem 2007 ka la kren shai ba ym lah ban ktah ia u Lum Shyllong, nangta ka NGT order 2021 ka la ai hukum kaba khlaiñ wat ïa u shipai ban pynkhyllem dieng ba dei ban sangeh baroh ki jingtei ha u Lum Shyllong, nangta ha ka por ba dang long Myntri Rangbah u (L) Dr. D D Lapang la thaw ïa ka committee halor u Lum Shyllong bad u la ong ba u dei u klongsnam ka nongbah Shillong, nangta ka Ministry of Forest and Environment dangshen ka la dep ban shondur bad ringdur ïa ki mrad ba don ha u Lum Shyllong bad lada la pynjot shano kine ki mrad kin leit.
“Halor ka jingïalang ka ban long ha ka sngi Palei ngin leit ban ai tang ka jingthoh sha ka sorkar bad ngin ym shong ha ka jingïalang namar ngim kwah ban rai ïa ka jingkyrduh um ka ban wan ha ki 5 bad 10 snem hadien bad kito kiba rai ki dei ban ai ki jingthoh khnang ba u paidbah un tip ba phi la shim ka jingkitkhlieh ïa ka jingeh jong ka pateng ka ban sa wan,” ong u Bah Nonglang.